Qaqtyǵys aımaǵyndaǵy jýrnalıstik qyzmet

Áskerı jýrnalıst qyzmetiniń ereksheligi jáne daǵdarys jaǵ­daıyn­da kommýnıkasııa jasaý má­seleleri túsindirilgen is-sha­rada sarapshylar jýrnalısterge aqparattyq jáne qarsy nasıhat jumysynyń túrleri, halyqqa aqparattyq-psıhologııalyq áser etý ádisteri, qoǵamdyq-saıası jáne áleýmettik-ekonomıkalyq salalarda daǵdarystyq jaǵdaı­lar týyndaǵan kezde áreket etý algorıtmderi týraly jetkizdi. Áskerı qaqtyǵys jaǵdaıyndaǵy jýrnalısterdiń jumysyna, tabı­ǵı jáne tehnogendik sıpattaǵy tótenshe jaǵdaılar qaýpi kezinde halyqty habardar etý tásilderine erekshe nazar aýdaryldy.

Dáris kýrsynan keıin ádiste­melik sabaqtar ótti. Onda TJ rejimi, jappaı tártipsizdikter oryn alǵanda jáne terrorızmge qarsy operasııa júrgiziletin aımaqta jýrnalıst jumysynyń erekshelikteri qaraldy. Qorǵanys mınıstriniń baspasóz hatshysy, podpolkovnık Rýslan Jangýlın semınar aıasynda aqparattyq qaýipsizdik, sondaı-aq aqparattyq qarsy kúres máseleleri mańyzdy ekenin aıtty.

– Áskerı qaqtyǵystar týyn­da­ǵan kezde jýrnalısterdi saýa­t­ty is-áreketke daıyndaý tur­ǵysynan bizde jaqsy táji­rıbe jınaqtaldy, – dedi ol. – Birneshe jyl boıy ekstremaldy jýrnalıstıkadan áskerı dıskýrstar ótkizip kelemiz. Dala­lyq jaǵdaıda jýrnalıs­ter betpe-bet kelýi múmkin ssena­rıılerdi pysyqtadyq. Bú­gin semınarǵa qatysýshylar áske­rı qaqtyǵystar aımaǵynda ju­mys isteý erekshelikterimen ta­nys­ty. Budan basqa memle­ket­tik organdar baspasóz qyz­metteriniń ókilderine daǵdarys jaǵdaılarynda is-áreketti úıles­tirý jóninde usynystar berildi.

Qorǵanys vedomstvosynyń ókili otandyq jýrnalısterdiń áskerı saladan jetkilikti deń­geıde habardar bolýy keregin atap ótti. Bul turǵyda búgingi tańda áskerı taqyrypqa mamandanǵan tilshilerdiń quzyrettiligin arttyrý, Qarýly kúshterdiń tynys-tirshiligin, jaýyngerlik qyzmetin neǵurlym kásibı túrde jarııalaý úshin jaǵdaı jasaý maqsatynda túrli is-sharalar qolǵa alynyp keledi.

Semınar sońynda jýrnalıstermen kezdesken Qorǵanys mınıstriniń orynbasary Darhan Ahmedıev, Mádenıet jáne aqpa­rat vıse-mınıstri Qanat Ysqaqov qatysýshylarǵa sertıfıkattar tabys etti. Darhan Ahmedıev elimizdiń Aqparattyq doktrınasyn iske asyrý jónindegi is-áreket jos­paryna sáıkes ótkizilgen semınarda qaralǵan máselelerdiń ózektiligin atady. Mádenıet jáne aqparat vıse-mınıstri bul is-sharanyń negizgi maqsaty – baspasóz qyzmeti, BAQ jáne blogerler qaýymdastyǵy ókilderiniń daǵdarys kezinde, tótenshe jaǵdaılar jáne áske­rı qaqtyǵys jaǵdaıyndaǵy jumysynyń erekshelikteri men is-áreketteri, olar­dyń kásibıligi men jumys sapasyn arttyrý, sondaı-aq halyqty naqty jáne ýaqtyly aqparatpen qamtamasyz etý ekenin jetkizdi.