Dúnıede meıirimdi júrekten artyq ne bar? Eń uly istiń, eń sulý sózdiń, eń názik gúldiń, eń móldir kózdiń tuńǵıyǵy meıirimde jatyr. Búgin aıtqymyz kelip otyrǵan Nıkolas Ýınton esimdi jannyń ár demi meıirimnen turady desek, artyq aıtpaǵan bolar edik. Ol jan shydatpas azaptan 669 evreı balasyn qutqaryp qalǵan.
Alyp júrek ıesi 1909 jyly Londonda dúnıege kelgen jáne 106 jasqa deıin ómir súrgen. Qarapaıym evreı otbasynan shyqqan Nıkolas tabysty broker bolyp qyzmet atqarǵan. Ol qanshama jannyń ómirin taǵdyr talaıynan qalaı qutqaryp qaldy?
1938 jyl. Qyrkúıek aıy. Ulybrıtanııa, Fransııa, Italııa jáne Germanııa memleketteriniń basshylary «Mıýnhen kelisimine» qol qoıdy. Qujat boıynsha Chehoslovakııanyń Sýdet oblysy Germanııaǵa ótýi kerek. Al bul oblysta qanshama evreı otbasy turatyn. Nemisterdiń evreılerge degen kózqarasyn, kórsetken azabyn aıtpasam da, bilip otyrsyz.
Uly meıirim kóshi osy kezde bastalǵan. Nıkolas balalardy qutqaramyn degen sheshimge keledi. Ol jetimderdiń, ata-analary qamaýǵa alynǵandardyń, naýqastardyń, kedeılerdiń tizimin jasaıdy. Kún saıyn Praganyń aınalasynda bosqyndar lagerlerin aralap, bárin habardar etedi. Balalar Anglııaǵa ketýi úshin olarǵa úı-jaı, qamqorshy tabady. О́z qaltasynan bárine aqsha beredi. Istiń barlyq kem-ketigin tolyqtyryp, júıelep alǵan soń, 7 poıyzǵa 669 balany otyrǵyzyp, ólim men azap tuzaǵynan alysqa alyp ketedi.
Odan keıin qaharly soǵys bastaldy. Ýaqyt zymyrap ótip, barlyǵyn óz ornyna qoıdy. Al Nıkolastyń erligi týraly tiri jan bilmedi. Iá, bul is 49 jyl boıy qupııa kúıde jatty. 1987 jyly áıeli onyń eski jazba kitapshasyn kezdeısoq taýyp alady. Solaı ǵalamǵa izgiligin shashqan iz kúlli álemge áıgili bolady.
1988 jyl. BBC arnasy Ýıntondy tok-shoýǵa shaqyrady. Muny estigen batyrymyz ań-tań. Al júrgizýshi onyń qaıyrymdy isi týraly aıtqanda, tipten tańǵalady. Degenmen tosynsyı men tańǵajaıyp sátter munymen bitpedi. Zalda Nıkolas 50 jyl buryn ómirin saqtap qalǵan balalar da otyr. Meıirimdi júrek ıesi olardy kórgende kózine jas aldy. Meıirim kóshi osymen aıaqtaldy dep oılasańyz, qatelesesiz. Ol eshqashan aıaqtalmaıdy.