Aqtaýdaǵy sarbazdar qolda bar quraldardan jaýyngerlik mashına jasady. Osylaısha, «Batys» óńirlik qolbasshylyǵyndaǵy teńiz jaıaý áskerleri brıgadasynyń merzimdi qyzmettegi sarbazdary robottehnıkadan mashyqtaryn kórsetti.
Týyndy avtorlary – 10 aı buryn Túrkistan oblysynan shaqyrylǵan 2-shi shabýyldaý batalonynyń mehanık-júrgizýshileri. Biri – qatardaǵy jaýynger Battal Osmanov. Ol bala kezinen dızaınmen aınalysqandy unatady. Endi mine, bala qııaly búginde adamnyń kúndelikti ómirin jeńildetýge kómektesetin aqyldy qurylǵylar jasaýǵa sep bolyp otyr.
– Vzvodtardyń jaýyngerlik atystary aıaqtalǵannan keıin Iýsýf ekeýimizge batalon komandıri qashyqtan ózin ózi basqaratyn jaýyngerlik mashına jasańdar degen tapsyrma júktedi. Birden syzbasyn syzyp, oı-qııalǵa erik berip, quraldardan mashına jasaýǵa kiristik. Ony jasaýǵa eki apta ketti. Mashınaǵa bizdiń batalonnyń «Barys» degen aty berildi. «Brondy mashınanyń» salmaǵy shamamen on kılo, basqarý pýlti bar, 7,62 mm PKT otshasharmen jabdyqtalǵan. Otshashar 360 gradýsqa burylady, barynsha qozǵalys jyldamdyǵy 10-15 km/saǵ. Bolashaqta ony jetildirsek dep otyrmyz, múmkin granata atqyshty ornatyp, shassıdi kúsheıtip, jyldamdyqty arttyratyn shyǵarmyz, – dedi Battal Osmanov.
О́nertapqyshqa serik bolǵan Iýsýf Parmanqul da burynnan elektrotehnıkamen jáne avtomobıldermen, mektepte robottehnıkaǵa áýestengen. Tipti kolledjde «tehnık-elektrık» mamandyǵyn meńgerip, robottehnıka boıynsha «Turkestan World Skills» halyqaralyq jarystaryna qatysypty. Bul jetistik áskerı qyzmettiń bedelin arttyryp, sarbazdardyń qyzmet barysynda áskerı isti meńgerip qana qoımaı, talantyn ashýǵa jáne ózin kórsetýge múmkindik beretinin aıǵaqtaıdy.