Bıylǵy Naýryz merekesin birlik, baýyrlastyq pen yntymaq meıramy retinde qarastyratyn jańa tujyrymdamaǵa sáıkes atap ótý josparlanyp otyr. Aqtóbe oblysy turǵyndary da 14-23 naýryz kúnderi aralyǵyndaǵy ár kúndi qazaqtyń salt-dástúrimen, ulttyq bolmysyn ashyp kórsetýge baǵyttalǵan «Naýryznama» tujyrymdamasyna saı toılamaqshy.
Qys ketip, toqsan shyǵyp, kóktemniń alǵashqy habarshysyndaı bolyp engen Kórisý kúnin Mártók, Qarǵaly, Baıǵanın, Oıyl aýdandarynyń turǵyndary erekshe atap ótip jatyr. Bul kúni Aqtóbe qalasy Jastar resýrstyq ortalyǵynyń qyz-jigitteri qaladaǵy «Shyǵys» bazaryna kelip, turǵyndardy Amal kúnimen quttyqtap, ystyq baýyrsaq úlestirdi.
15 naýryzdan bastap oblys aýmaǵynda ıgi ister marafony uıymdastyrylady. Qazirgi kezde barlyq aýdan azamattary osy kúni atqarylatyn is-sharalar jobasyn, merekege daıyndyq jumystaryn pysyqtaý ústinde. «Mádenıet jáne ulttyq salt-dástúr kúni», «Shańyraq kúninde» Analar keńesiniń kezdesýleri, kelinder baıqaýy, ulttyq pedagogıka jáne otbasy ınstıtýtyn nyǵaıtýǵa baǵyttalǵan is-sharalar josparlanyp otyr. Ulttyq kıim kúni qazaqtyń ulttyq kıimderin nasıhattaýǵa baǵyttalǵan sándi kıimder kórsetilimi ótedi. Osy kúni mádenıet qaıratkerleri, ártister, sportshylardyń qatysýymen «Ulttyq kıim kúni» chellendji josparlanǵan. «Jańarý kúni» oblys aýmaǵynda joldar, aryqtar men ótkelderdi tazartý jumystary júrgiziledi. Bul kúni Baıǵanın aýdanynyń jastary eldi mekender janyndaǵy bulaq kózderin tazartýǵa kirisedi. Qaraýylkeldi, Altaı batyr aýyldarynyń jigitteri bulaq aınalasyn abattandyrýdy mamyr aıyna deıin jalǵastyrmaqshy. «Tazalyq estafetasy» aıasynda aryqtar, aýlalardy tazalaý jumystary júrgiziledi. «Ulttyq sport kúni» oblystyq dene shynyqtyrý jáne sport basqarmasy qazaq kúresi, arqan tartý, qol kúres, gir kóterý, asyq atý, láńgi tebý, qoshqar kóterý boıynsha saıystar uıymdastyrady.
Jergilikti qolónershiler jumystarynyń kórme-jármeńkesi «Dalida Center» saýda ortalyǵynda josparlanǵan. Munda «Sheber Art Aktobe» qaýymdastyǵynyń 30-dan asa qolóner sheberi biregeı buıymdaryn usynady. Jármeńkede turmystyq zattar, ulttyq kádesyılar, etnıkalyq stıldegi kıimder satyp alýǵa bolady. Aqtóbe oblysynyń turǵyndary osylaısha bıylǵy naýryzdy taǵylym alarlyqtaı ónegeli istermen atap ótýge kiristi.
Aqtóbe oblysy