Elimizde 1 naýryzdan bastap «Otaý» baǵdarlamasy iske qosyldy. «Otbasy bank» usynyp otyrǵan jańa joba aıasynda bıyl 8000-ǵa jýyq azamat baspanamen qamtylady dep josparlanyp otyr. Baǵdarlama áleýetin odan ári arttyrý maqsatynda «Otbasy bank» basshylyǵy «Qazaqstan qurylys salýshylar» qaýymdastyǵymen jáne Qazaqstan qurylysshylar odaǵymen kezdesip, odan ári damytýdy kózdeıtin baǵyttardy talqylady.
Kezdesýdiń maqsaty – «Otaý» baǵdarlamasy arqyly qoljetimdi baǵamen bank salymshylaryna turǵyn úıdi satý boıynsha qurylys salýshylarmen yntymaqtastyq ornatý. Nátıjeli bolsa, bul bolashaqta jańa turǵyn úı baǵdarlamasy aıasynda baspana baǵasynyń ósýin tejeýge múmkindik beredi.
«Otbasy bank» AQ basqarma tóraǵasy Lázzat Ibragımovanyń sózinshe, «Otaý» baǵdarlamasy – turǵyn úı qurylys jınaq júıesine qatysýshylar úshin baspana satyp alýdyń tıimdi quraly. Bul el turǵyndary arasynda únemdeý mádenıetin nyǵaıtýǵa ári arttyrýǵa baǵyttalǵan. Sebebi aqshasyn tirnektep jınap, kúndelikti shyǵyndaryn esepteı bilgen adam ǵana tómen paıyzben úı alatyny belgili. Alaıda klıentterimiz úshin baspana baǵasy sharyqtap ketpeı, belgili bir mejeden aspaǵany jón. Mundaı kelisimge qol jetkizý úshin qurylys kompanııalarynyń bankpen yntymaqtastyq qurýy mańyzdy», dedi ol.
Jalpy, 13 naýryzdaǵy jaǵdaı boıynsha bank klıentteri atalǵan baǵdarlamaǵa qatysýǵa 8 180 ótinim bergen. Áli de qabyldaý júrip jatyr. Sondaı-aq qarbalas týdyrmaý úshin ótinim qabyldaý merzimi 30 sáýirge deıin jalǵasady. Eń bastysy, bank óz klıentin turǵyn úıdi tezirek tańdaýǵa jáne satyp alýǵa asyqtyrmaıdy. Ol úshin 6 aı ýaqyt berilgen, sondyqtan baǵdarlamaǵa qatysýshylar ózine qolaıly baspana taýyp úlgeredi. «Otaý» baǵdarlamasynyń talaptary boıynsha Almaty, Astana, Shymkent qalalarynda jáne oblys ortalyqtarynda tek alǵashqy naryqtan turǵyn úı satyp alýǵa bolady. Al basqa aımaqtarda kez kelgen turǵyn úıdi satyp alýǵa ruqsat.
«Otbasy bank» AQ arqyly beriletin mundaı ıpotekalardyń ekinshi deńgeıli bankter ónimine qaraǵanda bastapqy jarnasy da, paıyzdyq mólsherlemesi de tómen. Biz aıtyp otyrǵan «Otaý» baǵdarlamasynyń paıyzdyq mólsherlemesi – 9% (JTSM 9,2%-dan bastap), zaem somasynyń 50%-y jınaqtalǵannan keıin nesıe boıynsha mólsherleme jyldyq 3,5-ten 5%-ǵa deıin (JTSM 3,6%-dan bastap) tómendeıdi. Bastapqy jarnasy – 20%. Nesıeni 19 jylǵa deıin rásimdeýge bolady. Oǵan 18 ben 63 jas aralyǵyndaǵy bank salymshylary qatysa alady. Negizgi shart – 18 aı merzimindegi depozıtiniń ári onda kemi 1 mln teńge salymynyń bolýy. Sondaı-aq qatysýshynyń jáne onyń otbasy músheleriniń sońǵy 5 jyl ishinde menshiginde jyljymaıtyn múlki bolmaýǵa tıis. Úmitkerlerdiń sońǵy 6 aıdaǵy turaqty tabysy da qaralady.
«Mysaly, byltyr respýblıkada 17,5 mln sharshy metr turǵyn úı salynǵan. Bul – 157 myń páter. Bizge osy páterlerdi satý boıynsha kóp qurylys kompanııalary kelip, qandaı da bir tıimdi ıpotekalyq baǵdarlamalar bar-joǵyn suraıdy. Árıne, biz eń aldymen jumys isteıtin jastardyń, jas otbasylardyń úıli bolýyna jaǵdaı jasaýǵa tyrysamyz. Ekinshiden, bul – jańa páterler. Olardy qatysýshylar «Baspana market» portalynan tańdaı alady. Baǵdarlamaǵa qatysý jónindegi óz ótinishterin de el turǵyndary osy portal arqyly joldaı alady. 1 mamyrdan bastap ótinish bergen azamattardyń qujattaryn saraptaıtyn bolamyz», dep atap ótti L.Ibragımova.
«Baspana market» portalynyń (otbasybank.kz) qyzmeti óte yńǵaıly. Munda siz banktiń baǵdarlamasyna qatysýǵa ótinish bere alasyz, turǵyn úıdi tańdap, brondap, nesıe rásimdeý úderisin bastaı alasyz. Bul – bank klıentine anyqtama ákelýdiń, kezekte turýdyń, fılıaldarǵa baryp ýaqytty ysyrap etýdiń qajeti joq degen sóz.
Atalǵan portal qurylys salýshy kompanııalar úshin de tıimdi. Olar óz jeke kabıneti arqyly qurylys nysandaryn ornalastyryp, páterlerdi satý úderisin sıfrlandyra alady. Demek fılıalǵa olar úshin de tom-tom qujatpen kelýdiń, qaǵaz betindegi kelisimshartqa qol qoıýdyń qajeti joq. Mysaly, bul jumys buryn orta eseppen 2 saǵatqa sozylsa, qazir 20 mınýt ýaqyt ketedi eken.
«Kompanııalar óz páterlerin «Baspana market» platformasyna ornalastyrmas buryn turǵyn úıdiń aǵymdaǵy naryqtyq baǵasyna kelisý jumystaryn júrgizetin bolady. Árıne, bul jerde qurylys materıaldary baǵasynyń ózgerip turýy da baspana baǵasyna áserin tıgizbeı qoımaıdy. Eger ol naryqqa sáıkes kelse, onda qurylys salýshymen birge páterdiń 1 sharshy metr baǵasy belgilenip, turǵyn úıdi satý týraly kelisim jasalady. Osy arqyly jańa turǵyn úı baǵdarlamasynyń bastalýy aıasynda turǵyn úı baǵasynyń jasandy ósýine jol bermeımiz», dep sózin túıindedi «Otbasy bank» AQ basqarma tóraǵasy.
Statıstıka boıynsha, bankte depozıtine 1 mıllıon teńge jınaǵan, salymynyń merzimi 18 aıdan asatyn 300 myń salymshy bar. Sonyń ishinde 51 myń klıenttiń depozıtinde orta eseppen páter qunynyń 20%-yna jetetin jınaqtary bar eken. «Otaý» baǵdarlamasy 7 jylǵa eseptelgenin eskersek, «Otbasy banktiń» kemi 56 myń salymshysy osy ýaqyt aralyǵynda atalǵan baǵdarlama kómegimen baspanaly bola alady degen sóz.