Atyraýda ótip jatqan Ulttyq quryltaıdyń úshinshi otyrysynda memleket damýyna bastaıtyn mańyzdy mindetter saralandy. Quryltaıda Prezıdent tilge tıek etken tarıhı-mádenı qundylyqtarymyzdy nasıhattaý men qorǵaý isine qatysty Qazaqstan Respýblıkasy Memlekettik Ortalyq mýzeıiniń dırektory Rashıda Harıpova pikir bildirdi, dep habarlaıdy Egemen.kz.
Ult qaımaqtary bas qosqan ordaly jıynda Memleket basshysy Qasym-Jomart Toqaev eldiń áleýmettik-ekonomıkalyq damýymen qatar, rýhanı-mádenı óristeýine negizdelgen mańyzdy máselelerge nazar aýdardy. Elimizdiń ótkeni men búgini hám bolashaǵy onyń tarıhı murasymen tyǵyz astasyp jatqanyna nazar aýdarǵan Memleket basshysy: «Qazaqstandy «Tańbaly tastar mekeni» dep beker aıtpaıdy. Eshkiólmes jotasy – Eýrazııa qurlyǵyndaǵy petroglıfi eń kóp jerdiń biri. Arpaózen, Quljabasy, Saýysqandyq saılarynda kóptegen tarıhı sýret saqtalǵan. Bul jádigerler – Dala órkenıetiniń san myń jyldyq shejiresi. Sońǵy jyldary qurylysqa qajet degen jeleýmen keıbir jádigerlerimiz búlinip jatyr. Biz teńdessiz tarıhı nysandarymyzdy joıýǵa jol bermeı, muqııat qorǵaýymyz qajet... Biz baı tarıhı-mádenı muralarymyzdy saqtaý úshin arheologııa salasynda tártip ornatýymyz kerek...» dep atap ótti.
О́tkennen ónege almaı, keleshekke kerýen tartý múmkin emes. Ulanǵaıyr dalamyzdaǵy tarıhı mańyzy joǵary jádigerler men nysandar – ultymyzdyń baǵa jetpes baılyǵy. Prezıdent Qasym-Jomart Kemeluly qolda bar qundylyqtardy kózdiń qarashyǵyndaı saqtaýǵa mán berý kerektigin basa aıtqany kóńil toǵaıtady. Tasyn túrtseń tarıh sóıleıtin shejire dalamyzdyń qoınaýynda mundaı qasıetti oryndar az emes. Olarǵa aıryqsha mańyz bólip, ǵylymı turǵydan zerttep-zerdeleý jumystaryn qolǵa alǵan abzal. Álemniń ozyq elderi óz tarıhymen, kóneden qalǵan asyl muralarymen maqtanady. Máselen, baýyrlas túrik elindegi ejelgi sáýlet, halqyna dáýlet ákelip jatqanyn jaqsy bilemiz. Osyny tereńnen zerdelegen Prezıdent, tarıhı jádigerlerdi qorǵaýdyń keshendi sharalaryn qolǵa alýdy tapsyrdy.
Quryltaı otyrysynda tarıhı-mádenı mura sanatyna kiretin nysandarǵa restavrasııa jasaý isin retke keltiretin sharalardy qolǵa alý kerektigi, keıbir tarıhı jádigerlerimizdi shetel murajaılarynan Qazaqstanǵa qaıtarý jumystaryn jandandyrýdyń mańyzdylyǵy basa aıtyldy. «Tipti ondaı múmkindik bolmasa, elimizdegi murajaılarǵa qoıý úshin jádigerlerimizdiń dálme-dál kóshirmesin jasaý kerek», dedi Prezıdent. Mádenıet salasyndaǵy Quryltaı múshelerine bul máselege aıryqsha mán berý tapsyryldy.
Bul mindetterdiń júıeli júzege asýy – ulttyq biregeıligimizdi nyǵaıtatyny anyq. Sebebi tarıhy men mádenıetine mán bergen halyqtyń qaı kezde de upaıy túgel. Atalǵan baǵyttaǵy jumystardy jandandyrýǵa el mýzeıleriniń jetekshi mamandary da jumylýǵa tıis.