Aqmola oblysynyń Selınograd aýdanyna qarasty Qoıandy aýylyndaǵy úılerin sý alǵan turǵyndar tótenshe jaǵdaı jarııalaýdy talap etip, narazylyǵyn bildirdi. Sebebi jaǵdaı ýshyǵyp, biraz turǵyn úı men aýlalardy sý basyp qalǵan. Jaǵdaıdy kózben kórip, jaýapty mekemelerdiń ýájin tyńdap kórdik.
Aýyl turǵyndarynyń qaı-qaısysynan surasań da: «qysta qarǵa, kóktem men jazda laı-batpaqqa batamyz», deıdi. Sóıtip, keshe jergilikti turǵyndar sý basýǵa qarsy is-shara qoldanýǵa jergilikti bıliktiń nazaryn aýdarý maqsatynda jolǵa jınalǵan. Narazy turǵyndarmen Selınograd aýdanynyń ákimi Baqytbek Ospanbekov jáne Aqmola oblystyq TJD basshysy Qanat Dospaev kezdesip, jaǵdaıdy turaqtandyrýǵa kirisken.
«Saǵat 22.00-de barlyq jol ashylyp, turǵyndar úılerine tarady. Qazirgi ýaqytta Qoıandy aýylynda sý tasqynyna qarsy kúsheıtilgen is-sharalar júrgizilip jatyr. Shamamen 150 myń tekshe metr qar tasymaldandy. Sondaı-aq Qoıandy aýylynda 9,5 myń metr aryq pen kanal, 46 sý ótkizý qubyry tazartyldy, 35 myń tekshe metrden astam qar sýy shyǵaryldy», deıdi aýdan ákimi.
Al aýyl turǵyndary Qoıandy aýylyn sý alǵany tek bıyl ǵana emes ekenin aıtady. Olardyń aıtýyna qaraǵanda, mundaı keleńsizdikti túbegeıli joımasa, jylda osylaı zar qaqsap otyratyn kórinedi.
«Jalpy aýyldyń qurylys jospary ǵylymı jobalanbaǵan. Beıbereket salynǵan úılerden qarǵyn sý aǵyp óte almaı, úılerdi sý basyp jatyr. Burynǵy sýaǵarlarǵa da úı salynyp, aryqtardyń joly bógelgen. Buǵan qosa aýyl arasyna asfalt jol salǵanda sýaǵar qaldyrmaǵan, ıaǵnı kóterińki salynǵan joldyń kóbinde kópir joq. Al qysta qar shyǵarý jumysy da durys bolmady. Joldy ashyp qoıǵannan basqa ónimdi jumys atqarylǵan joq. Erigen qar sýynyń qaıdan kelip, qaıda ketetini jóninde tekserý júrgizilip, daıyndyq jasalý kerek qoı», deıdi aýyl turǵyny Qurmetbek Bergenov.
Qoıandy aýylynyń ákimi Baqythan Soltanbaı da bul ýájdi joqqa shyǵarmaıdy. Onyń aıtýynsha, qar sýynyń basýyna eń birinshi qarjynyń jetispeýshiligi bolsa, ekinshi aýyl qurylysy durys josparlanbaǵan.
«2004 jyly Qoıandy aýylynda 58 úı bolsa, 2024 jylǵa deıin 5 myńǵa jaqyndady. Aýyldyń ishki joly – 180 shaqyrym. Onyń 30 shaqyrymy – asfalt. 108 kóshe bar. Aýylda sý jınalatyn toǵan bar. Ol jeke kásipkerge tıesili. Biraz sý soǵan jınalady. Buǵan qosa sý tasqynynyń aldyn alýǵa arnalǵan aryqtar qazylǵan. Alaıda aýyl áý basta ınfraqurylymsyz salynǵan. Mysaly, birinshi úı salynǵan (taǵany talapqa saı emes), odan keıin jol túsken. Jol úılerden bıik tur. Máseleniń ýshyǵýyna osyndaı nárseler sebep bolyp otyr. Qysta qar shyǵarýǵa 55 mln teńge bólindi. Biraq aýyldyń búkil qaryn qys boıy shyǵaryp otyrýǵa bul qarajat jetkiliksiz. Buǵan eń kemi jarty mlrd qarjy kerek. Munymen máseleni túbegeıli sheshýge bolady. 55 mln qarjynyń kúshimen jumystar júrgizildi. 38 myń tekshe metr qar shyǵaryldy. Atqarylǵan jumystardy aýdan basshylyǵyna baıandap otyrdyq. Qysqasha aıtqanda, Qoıandynyń mártebesi – aýyl, oǵan bólinetin qarjy da aýyldyq deńgeıde. Al shyn máninde bul aýyl – keıbir aýdandardan da iri eldi meken», deıdi aýyl ákimi.
Qoıandy aýylynda sý sorý jumystary jalǵasyp jatqany baıqalady. Qazirgi kezde jaǵdaı birshama turaqtanǵan. Aqmola oblysy TJD baspasóz qyzmetiniń málimetinshe, sý tasqynyna qarsy jumystarǵa Aqmola oblysy men Astana qalasy TJD jáne jergilikti atqarýshy organdardyń kúshteri men tehnıkasy tartylǵan.
«27 naýryz kúngi saǵat 06.00 jaǵdaı boıynsha Qoıandy aýylynda 80 myń tekshe metr erigen qar sýy sorǵyzyldy. Buǵan Aqmola oblysy men Astana qalasy TJD jáne jergilikti atqarýshy organdardan 76 adam, 17 tehnıka jáne 18 motopompa tartyldy. Qazirgi kezde jaǵdaı qalypty», dedi Aqmola oblysy TJD bastyǵy Q.Dospaev.