О́ńirde sý deńgeıi kóterilip, keı jerde arnasynan asyp-tolyp ketken. Onyń ishinde Aqtoǵaı aýdany Abaı aýyly men Abaı aýdany Qulaıǵyr aýyly da bar.
Abyroı bolǵanda eldi mekenderdegi úılerge sý kirgen joq. Munymen qosa, aımaqtaǵy eki respýblıkalyq, tórt aýdandyq mańyzy bar joldy sý shaıdy.
Abaı aýylynda erigen qar sýy arnasynan asyp, dala jaılap ketken. Tótenshe jaǵdaılar departamenti men jergilikti atqarýshy organdar úılerdi shaıyp ketpeý úshin kúsh salyp jatyr. Sý arnasyn buryp, qap-qap qum tósep júr. Qazir jaǵdaı baqylaýda.
Abaı aýdanynda da erigen qar sýy mólsherden kóp bolyp, Qulaıǵyr aýylyna deıin sý kirgen. Biraq abyroı bolyp, úılerdi sý basý faktisi tirkelmedi. Departament mamandary men jergilikti atqarýshy organdar tıisti jumystardy atqaryp jatyr.
Shet aýdany, respýblıkalyq mańyzy bar «Almaty – Ekaterınbýrg» avtojoly Aqsý-Aıýly aýylyndaǵy jol boıynan da sý ótken. Eni 150 m, tereńdigi 15 sm.
Abaı aýdany, «Qyzylorda – Pavlodar» respýblıkalyq mańyzy bar avtomobıl jolynyń ýchaskesinde (Krasnaıa Polıana aýyly – Qulaıǵyr aýyly arasyndaǵy ýchaskede) sýdyń tolyp ketýine baılanysty kóliktiń barlyq túrleri úshin qozǵalys jabyldy.
Aqtoǵaı aýdany, «Aqtoǵaı – Núrken» aýdandyq mańyzy bar joldyń ýchaskesi jabyq, Aqtoǵaı aýyly arqyly balama jol bar.
Nura aýdany, oblystyq mańyzy bar «Qorǵaljyn-Barshıno-Shubarkól-Qyzyljar» tas jolynda sý tasqyny tirkeldi. Jolaýshylar kóliginiń qozǵalysy toqtatyldy.
«Qarqaraly aýdany, joldan sýdyń ótýine baılanysty «Egindibulaq-Qoıandy-Búrkitti» aýdandyq mańyzy bar avtomobıl jolynyń ýchaskesinde (Qoıandy aýyly – Egindibulaq aýyly) kóliktiń barlyq túrleri úshin qozǵalys jabyldy. Qarqaraly aýdany, oblystyq mańyzy bar «Nurken – Jańatoǵan» tas jolynda erigen sýdyń úlken kóleminiń aǵýy nátıjesinde eni 10-15 m, tereńdigi 1,5-2 m jol bóligi paıda boldy. Jol ýchaskesi jabyldy, jergilikti ákimdik pen polısııa qyzmetkerleri kezekshilikte», dep aqparat taratty oblystyq tótenshe jaǵdaılar departamentiniń baspasóz mamandary.
Qazir jaǵdaı tolyq baqylaýǵa alyndy.
Qaraǵandy oblysy