Tasqynnan qaýip tónip turǵan joldyń qos qaptalyna qumqapshyq qalanyp, motosorǵymen sý aıdaý jumystary júrip jatyr, dep jazady Egemen.kz.
Aýdanǵa kómekke túrli uıymdardyń qyzmetkerleri, eriktiler, turǵyndar kelip jatyr. Mysaly, orman sharýashylyǵy qyzmetkerleriniń mobıldi toby (18 adam, olardyń 11-i motorly qaıyqtardy basqara alady) Jangeldın aýdanynyń Aralbaı kentine 18 tehnıkamen birge kelip, halyqty evakýasııalaýǵa kiristi.
Sondaı-aq turǵyndardy evakýasııalyq pýnktterge ornalastyrý uıymdastyryldy. Sý basqan aýyldardan barlyǵy 550-ge jýyq adam evakýasııalandy, olar birinshi kezektegi kerek-jaraqtarmen, kıimmen, kórpemen, azyq-túlikpen qamtamasyz etiledi. Zardap shekkender «Sh.Ýálıhanov atyndaǵy orta mektep» KMM bazasynda jáne shyǵarmashylyq úıinde qurylǵan evakýasııalyq pýnktterge ornalastyryldy.
Balalar oqýlyqtarmen, kıimmen jáne keńse zattarymen qamtamasyz etildi, 1 sáýirden bastap aýdan ortalyǵynyń mektepterinde qashyqtan, sondaı-aq oflaın formatta sabaq bastaldy.
«Jergilikti organdar múliktiń ysyrabyn azaıtý, baılanys pen ınternetti qalpyna keltirý, sondaı-aq elektrmen jabdyqtaý boıynsha is-sharalar keshenin júrgizip jatyr. Sý ótkizý qurylystaryn tazartý jáne trassalar arqyly tolyp ketýdiń aldyn alý boıynsha jumystar da úzdiksiz júrgizilip jatyr», dedi Jangeldın aýdany ákimdiginiń qyzmetkerleri.
Búgingi tańda 22 eldi mekenniń 12-si elektr energııasyna qosylǵan.