Aqtóbe oblysynda sý tasqynynan tónetin qaýip seıilgen joq. Elek, Jem, Torǵaı, Yrǵyz, Oıyl, Qaraqobda, Temir, Sazdy, Jińishke, Qarǵaly ózenderindegi sý deńgeıi tómendemedi. Soǵan qaraǵanda jaǵdaı áp-sátte ózgerip ketýi múmkin.
2 sáýir kúni túnde Jińishke, Sazdy ózenderiniń deńgeıi kúrt kóterilip, eki ózenniń Elekke quıar tusynda ornalasqan Vohr, Mahambet eldi mekenderine aıtarlyqtaı qaýip tóndirdi. Qala ákimi Azamat Beket bastaǵan top ózen jaǵalaýyn topyraqpen bekitý jumystaryn júrgizdi. Elek ózeni arnasynan assa, jaǵalaýdaǵy úılerdiń turǵyndary qaıtadan ýaqytsha ornalastyrý oryndaryna kóshiriledi. Sý tasqynyna baılanysty qurylǵan óńirlik jedel shtab táýlik boıy kúsheıtilgen tártipte jumys istep jatyr.
30-31 naýryzda Aqtóbe qalasy men Muǵaljar, Temir, Oıyl, Qobda, Áıteke bı aýdandarynda tótenshe jaǵdaı jarııalanyp, sý basý qaýpi tóngen jerlerden 6 931 adam evakýasııalandy, onyń 2 777-si – balalar. Sý tasqynynan 762 turǵyn úı, 10 áleýmettik nysan, 189 aýla, 99 saıajaı úıleri zaqymdandy. Oıyl aýdanynyń Qaratal, Ekpetal aýyldarynyń búkil úıi tasqyn astynda qaldy. Eldi mekenderden 7 072 janýar qaýipsiz jerge shyǵaryldy, 3 myń bas mal sýǵa ketti. Búginde ýaqytsha ornalastyrý oryndarynda 2 649 adam turyp jatsa, 1 730-y óz úılerine oraldy. 20 mektepte evakýasııalyq pýnktter jumys istep, 33 mekteptiń 24 myń 896 oqýshysy qashyqtan oqýǵa kiristi.
Aqtóbe qalasy men bes aýdanda sý tasqynynan keltirilgen zalaldy anyqtaý jónindegi komıssııa jumysqa kiristi. Úı, mal-múlki búlingen turǵyndarǵa qaıyrymdylyq kómek kórsetýge ótinish bildirgen azamattardyń qarjysy «Qamqor-Aqtóbe 2024» qoǵamdyq qorynyń esepshotyna túsedi. Keshe Túrkistan oblysynan 30 tonna azyq-túlik, kıim-keshek, jeke gıgıenalyq quraldar tıelgen kerýen jetti. Qazirgi ýaqytta oblys pen bes aýdan ortalyǵynda sý tasqynyna baılanysty qurylǵan komıssııa músheleri sý basqan jerlerdegi ár úıdi aralap, esepke alyp júr. Olar arasynda sý kirmegen úılerdi de anyqtady. Endi qaladaǵy Elek pen Qarǵaly ózenderi jaǵasynda kóktem-jazda baqsha egip, kúz ben qysta bos turatyn kishkentaı saıajaı úıleri úshin ótemaqy tóleý qajet pe degen suraq týyndap otyr. Ondaı saıajaı úıleriniń sanyn anyqtap, ıelerimen kezdesý ýchaskelik ınspektorlarǵa júkteldi. Sondaı-aq tasqynnan zardap shekkenderdiń arasynda turyp jatqan úıleriniń qujaty joq adamdar da bar. «Soǵan qaramastan dúnıe-múlki isten shyqqan, kómekke muqtaj jandardyń tizimin komıssııa músheleri anyqtaıdy», deıdi «Qamqor-Aqtóbe 2024» qoǵamdyq qorynyń jetekshisi Abdýhat Myrzalın.
Aqtóbe qalasynyń irgesindegi Aqtóbe, Qarǵaly, Sazdy sý qoımalarynyń jaǵdaıy da – alańdatarlyq kúıde. 245 mln tekshe metr syıymdylyǵy bar Aqtóbe sý qoımasy búginde 89%-ǵa tolǵan. 27 naýryzdan kúni búginge deıin onyń shlıýzderinen sekýndyna 500 tekshe metrden sý jiberilip jatsa da, jan-jaqtan toqtaýsyz quıylyp jatyr. Sońǵy aptada osy sý qoımasynan 246 mln tekshe metr sý jiberildi. Sondaı-aq Aqtóbe qalasynyń ońtústik-batysyndaǵy 10 shaqyrym qashyqtyqta ornalasqan, syıymdylyǵy 6 mln tekshe metr bolatyn Sazdy sý qoımasy da erneýine deıin toldy. Qaladan 60 shaqyrym qashyqtyqta, 280 mln tekshe metr syıymdylyǵy bar Qarǵaly qoımasynda 245 mln tekshe metr sý jınalǵan. Osy jaǵdaıǵa baılanysty Sý resýrstary jáne ırrıgasııa mınıstri Nurjan Nurjigitov Aqtóbege keldi jáne jańadan tórt sý qoımasy salynatyny týraly habardar etti.
«27 naýryzdan bastap Aqtóbe sý qoımasyna 200 mln tekshe metrden asa sý quıylyp, barlyq vegetasııalyq kezeńde tolyǵatyn mólsheri eki-aq kúnde jınaldy. «Qazsýshar» RMK fılıaly mamandary, jergilikti memlekettik organdar, TJD qyzmetkerleri Aqtóbe qoımasynan sý jiberip, Elek ózeniniń tómengi jaǵyndaǵy úılerdi túgel shaıyp ketýden saqtap qaldy. «Qazgıdromet» boljamyna sáıkes 5 sáýirge deıin áli de Aqtóbe sý qoımasyna 210 mln tekshe metr, Qarǵaly sý qoımasyna 180 mln tekshe metr sý keledi. Endi eki sý qoımasynan shyqqan sýdyń Elek pen Qarǵaly ózenderiniń qosylǵan tusynda arnasynan shyǵyp ketpeýin «Qazsýshar» fılıaly mamandarymen birlese baqylaımyz», deıdi.
Aqtóbe oblysy