Bıyl Astanada 1085 ınternet-alaıaqtyq deregi tirkeldi. Azamattarǵa keltirilgen shyǵyn 500 mıllıon teńgeden asady. Elordanyń Kommýnıkasııalar qyzmetinde ótken brıfıngte Saryarqa aýdandyq PB basshysynyń orynbasary Jaslan Jaqaı alaıaqtardyń negizgi shemalary týraly aıtyp berdi, dep habarlaıdy Egemen.kz qala ákimdiginiń baspasóz qyzmetine silteme jasap.
Qazirgi ýaqytta júrgizilgen profılaktıkalyq jumystardyń nátıjesinde kıberqylmystar sany 11,5%-ǵa azaıdy.
Spıker óz sózinde alaıaqtardyń negizgi jumys shemalaryn atap ótti.
1) Jasandy ıntellekt arqyly banktiń qaýipsizdik qyzmetkerleriniń nemese quqyq qorǵaý organdarynyń atynan shaqyrýlar.
Bul jaǵdaıda alaıaqtar jasandy ıntellektiń ártúrli qosymshalaryn paıdalana otyryp, olardyń syrtqy túrin, daýysyn qoldan jasap, sol arqyly kúmándi banktik operasııalar nemese arnaıy operasııalar júrgizedi degen jeleýmen jańylystyrýy múmkin.
2) Áleýmettik jelilerde jáne saýda alańdarynda taýarlar men qyzmetterdi satý.
Internettegi qylmystyń bul túri taýarlar men qyzmetterdi satýdy kózdeıdi, bul jaǵdaıda alaıaqtar ártúrli syltaýlarmen joq taýarǵa aldyn ala tólemdi nemese tolyq tólemdi suraıdy.
3) Fıshıngtik saıttardy paıdalaný.
Alaıaqtyqtyń bul túri jeke derekter men banktik aqparatty jınaýǵa baǵyttalǵan. Mundaı saıttar resmı saıttarǵa qatty uqsas bolady. Alaıaqtar jalǵan veb-saıtty paıdalana otyryp, sizdiń banktik shotyńyzdyń tolyq málimetin alady, sodan keıin shottaǵy aqshaǵa qol jetkizý úshin aýdarymdar men basqa da operasııalar jasaıdy.
4) Krıptovalıýtaǵa, baǵaly qaǵazdarǵa ınvestısııalaý.
Atalǵan alaıaqtyqtyń qurbandary materıaldyq jaǵynan jaǵdaıy jaqsy azamattar bolyp sanalady, olar qosymsha tabys izdep, ınvestısııa salýǵa bolatyn jobalarǵa kezigedi. Alaıda ózderiniń jınaqtary men tabysyn jalǵan bank shottaryna aýdarady.
5) What's App messendjeriniń eseptik jazbasyna zańsyz kirý.
Mundaı jaǵdaıda alaıaqtar jalǵan silteme arqyly bir adamnyń jeke derekterin urlap alyp, sol adamnyń tanystaryna jalǵan habarlama joldaıdy. Habarlamada, árıne, aqsha suralady. Tanysyna kómektespekshi bolǵan adamdar óz qarajatyn jalǵan bank shottaryna aýdarady.
«Qurmetti qala turǵyndary men qonaqtary, ádette, utys oıyny jáne balalarǵa daýys berý túrinde taralatyn kúmándi siltemelerdi baspaý kerektigin eskertemiz. Qorytyndylaı kele, taǵy bir ret atap ótkim keledi, onlaın platformalarda taýarlar men qyzmetterdi satyp alǵanda muqııat jáne saq bolyńyz, jeke jáne banktik aqparattyń qupııalylyǵyn saqtańyz, múmkindiginshe eki faktorly aýtentıfıkasııany qosyńyz, belgisiz bireýlerge qarajat aýdarmańyz, ár operasııany tekserip otyryńyz», dep eskertti Jaslan Jaqaı.