Aqtóbe oblysynda sý basý qaýpi bar jerlerden 10 myń 138 turǵyn (onyń 4077-i bala) evakýasııalanyp, 10 663 bas mal qaýipsiz jerge kóshirildi. Qazirgi kezde ýaqytsha panalaý oryndarynda 1 636 adam turyp jatsa, onyń 689-y bala. Ázirge qaýip joq, 2 536 adam óz úıine oraldy, dep habarlaıdy Egemen.kz.
Aqtóbe oblysy TJD tótenshe jaǵdaılardy joıý basqarmasynyń bas mamany Nurbek Oralbaevtyń habarlaýynsha, 25 naýryz-6 sáýir aralyǵynda óńirde 1 061 turǵyn úı, 689 saıajaı úıleri men 46 ǵımaratqa sý kirgen. Kún kúrt jylynyp, qar erigen 21 naýryzdan bastap, kóshelerden 1 mln 360 myń tekshe metr sý sorylyp, 157 myń qapshyq, 300 myń tonna ınertti materıal jetkizilgen. Sý basý qaýpi bar aımaqtardan adamdardy qutqarýǵa Polısııa departamenti, TJD-niń jeke quramy, Ulttyq ulan jaýyngerlerinen 1 364 adam jumyldyrylyp, 247 birlik tehnıka, 200 birlik júzý quraldary, eki sý soratyn qondyrǵy paıdalanyldy.
Narýyzdyń sońǵy kúni Oıyl-Qobda tasjolyn tasqyn sý buzyp ketkendikten, Oıyl aýdany turǵyndary qatynassyz qaldy. Adamdar men kólikterdi pontondy ótkelmen jetkizý úshin Aqtóbe oblysyna Qorǵanys mınıstrligi ınjenerlik tobynyń áskerıleri kelip, 6 sáýirden bastap Oıyl aýdanynyń 427 turǵynyn ótkizdi, 400 kg azyq-túlik jiberdi.
О́tken táýlikte Qarǵaly ózenindegi sý deńgeıiniń kóterilýinen Aqjar, Jılıanka turǵyn úı alaptary men Sadovoe, Solnechnoe, EKO baý-baqsha ujymdaryna sý basý qaýpi tónip, osy aýmaqtan 76 adam evakýasııalandy, onyń 25-i bala. Olar qazirgi ýaqytta qaladaǵy №71 orta mekteptegi ýaqytsha ornalastyrý ornynda jatyr.
Aqtóbe oblysy