Batys Qazaqstan oblysynda búginge deıin 581 úı, 427 saıajaı sý tasqynynyń astynda qaldy. Sáýir aıynyń 9-y kúngi málimetke qaraǵanda, óńirde 7125 adam qaýipsiz jerge kóshirilgen. Olardyń 1523-i evakýasııalyq beketterdi panalasa, 5602 adam týǵan-týystarynda turyp jatyr.
Jaqyn kúnderi Jaıyq ózeniniń deńgeıi Reseıden keletin sýdyń áserinen qatty kóterilýi múmkin. Qazir ózen jaıylmasyndaǵy saıajaılarda turatyn turǵyndardy kóshirý qyzý júrip jatyr. 9-sáýirde 77 adam, onyń ishinde 29 bala qaýipsiz jerge jetkizildi.
О́ńirde qazir sý qoımalary erekshe baqylaýǵa alynǵan. Búgingi tańda «Qazsýshar» mekemesine qarasty sý qoımalary ortasha alǵanda 72%-ǵa tolyp tur. Bul sýdyń kólemi 399 mln tekshe metrdi quraıdy.
Mamandar Reseı Federasııasynyń Orynbor jáne Saratov oblystarynyń sý sharýashylyǵy qyzmetterimen kúndelikti aqparat almasyp otyr.
«Reseılik áriptesterdiń málimeti boıynsha, Batys Qazaqstan oblysynyń aýmaǵyna Prıýzen sý qoımasynan Qaraózenge sekýndyna 66 tekshe metr sý kelip jatyr. О́tkende sý tasqynynyń shyńy kezinde bul sekýndyna 550 tekshemetrge jetken edi. Qazir munda sý tasqyny aıaqtalyp qaldy. Saryózende de sý tasqynynyń beti qaıtty. Biz qos ózenge 400,0 mln tekshe metrden astam sý alyp úlgerdik. Onyń bári kólmekterge jáne tabıǵı shabyndyqtarǵa, sondaı-aq sý qoımalary men kólderdi toltyrýǵa baǵyttaldy», deıdi «Qazsýshar» mekemesi oblystyq fılıalynyń dırektory Raýan Qusaıynov.
Qazir Shaǵan sý qoımasynda sý deńgeıi 29,40 metr bolyp tur. Sý qoımasynyń barlyq qaqpasy 2023 jyldyń kúzinen bastap tolyq ashyq, tasqyn sý ımmarat arqyly erkin ótip, Jaıyqqa quıylyp jatyr. О́zen sýy deńgeıin saqtaý úshin tasqyn ótken soń sý qaqpalary jabylady. Qazir Shaǵan men Derkól ózenderiniń boıyndaǵy gıdrobeketter sý deńgeıi tómendep jatqanyn kórsetti.
Orynbor oblysynda ornalasqan Irekli sý qoımasynan Jaıyq ózenine sý tastaý mólsheri 9 sáýir kúni saǵat 08:00-de sekýndyna 1670 tekshemetr bolsa, saǵat 16:00-de sekýndyna 1342 tekshe metrge azaıtyldy. Osydan birer kún buryn bul kórsetkish sekýndyna 2170 tekshemetrge jetken edi.
Jaıyq ózeni bir táýlikte 7 sm qosyp, Oral qalasynyń tusynda saǵat 9-sáýir kúni tańǵy saǵat 08:00-de sý deńgeıi 710 sm boldy. Qaýipti deńgeı - 850 sm.
Jalpy, bıylǵy sý tasqyny bastalǵaly beri ózen deńgeıi 6 metrge kóterildi. Sáýir aıynyń ekinshi jartysynda Saqmar ózeni men Irekli sý qoımasynan keletin sýdyń esebinen Jaıyq sýy 10 metrge deıin kóterilýi múmkin deıdi mamandar.
Qazir Jaıyq ózeninen Jaıyq-Kóshim arnasyna sekýndyna 102 tekshemetr sý quıylyp jatyr. О́zge de sý qoımalaryna sý jınalýda. 8 sáýirden bastap kóltabandar men tabıǵı shabyndyqtarǵa sý berile bastady.
Batys Qazaqstan oblysy