Aqtóbe oblysynda sý tasqynyna baılanysty jaǵdaı turaqtalsa da, Aqtóbe qalasy men alty aýdanda jarııalanǵan tótenshe jaǵdaı rejimi alynǵan joq. Qalaǵa qaýip tóndirgen Aqtóbe, Qarǵaly, Sazdy sýqoımalaryndaǵy sý kólemi birqalypty.
Sý tasqyny kezinde eń kóp zardap shekken Oıyl aýdanynyń Ekpetal, Jańabaz jáne Qaratal aýyldarynda 340 úıdi sý bassa, 49 úı áli kúnge deıin sý astynda. Osy aýyldardyń turǵyndary on kúnnen beri aýdan ortalyǵyndaǵy úsh evakýasııalyq oryndy panalap otyr.
Vıse-premer Serik Jumanǵarın 8 sáýirde Oıyl aýdanyna kelip, evakýasııalyq oryndardy aralap, osy jerdegi turǵyndarymen júzdesti. Baspanalarynan, malynan aıyrylǵan turǵyndar vıse-premerden jáne oblys ákimi Ashat Shaharovtan turýǵa jaramsyz bolyp qalǵan baspanalary úshin memleketten qansha ótemaqy tólenetinin, úıdiń qashan salynatynyn surady. Ekpetaldaǵy 48 úıdiń, Jańabazdaǵy 19 úıdiń ıesi Oıyl eldi mekeninen jańa baspana salyp berse, aýdan ortalyǵyna birjolata qonys aýdarýǵa kelisetinderin aıtty. Serik Jumanǵarın aýdan ákimi Asqar Qazybaevqa osy usynysty nazarǵa alyp, ınjenerlik ınfraqurylymy júrgizilgen jer telimderinen qurylys oryndaryn tezirek tańdaýdy tapsyrdy.
Oıyl aýdanynyń birneshe eldi mekeni arasynda sýdyń qaıtpaýy sebepti baılanys joq. Aýylishilik joldar buzyldy, Oıyl-Qobda tasjolynyń aýdan ortalyǵyna kireberisindegi úlken kópirdi seń buzyp ketken. Qazir jurt ýaqytsha pontondy ótkel arqyly qatynap júr. Saraljyn aýyldyq okrýgi Shıqudyq aýlynda elektr jaryǵy joq, sý qubyryn seń buzyp ketken, jol qatynasy úzilgen. Azyq-túlik aýylǵa tikushaqpen jetkizilip jatyr. Shıqudyq aýlynyń turǵyndary tasqyn buzǵan jol ýchaskeleri men ótkelderdi tezirek jóndep berýdi surady. Vıse-premer sý tasqynynan zardap shekken Qobda aýdanyna da keldi. 27 naýryzda aýyl shetindegi Qobda ózeni arnasynan shyǵyp, aýdan ortalyǵyndaǵy 279 úıdi, ákimshilik ǵımaratty basyp qaldy, mektep pen birneshe dúkenge sý kirdi. Turǵyndar aýdan ortalyǵyndaǵy sport kesheni ǵımaratyna ýaqytsha ornalastyryldy. Búginde 25 úı tolyǵymen qırap, 12 úı apatty jaǵdaıda. Vıse-premer Qobda aýdanynyń ákimi Izgilik Tynymgereevke zardap shekkenderge arnap tezirek úı qurylysyn bastaýdy tapsyrdy. Byltyr kóktemde de Qobda eldi mekeniniń 25 úıi sýǵa ketip, jańa baspana salynǵan edi.
Sý tasqyny kúnderi 55 eldi meken elektr qýatynan ajyratylǵan. Qazir 34 eldi mekende elektr qýaty qalpyna keltirildi. Osy jumystarmen 60 adamnan turatyn 11 brıgada shuǵyldanyp jatyr.
Aqtóbe oblysy