Finprom.kz qarjy agenttigi júrgizgen esepke qaraǵanda, el turǵyndarynyń 2023 jyly alǵan aılyq mólsheri ortasha jalaqy kóleminen 4 ese az ekeni anyqtaldy, dep jazady Egemen.kz.
2024 jyldyń 1 qańtarynan bastap elimizde eń tómengi jalaqy mólsheri 85 myń teńge bolyp bekitilgen edi.
2022 jyly Qazaqstanda modaldi jalaqy ortasha deńgeıden 4,5 ese az boldy. Soǵan qaramastan, 2022 jyly eldegi modaldi jalaqy 18,4%, al 2023 jyly 18,7%-ǵa ósti. Alaıda ınflıasııany eskersek, kópshilik alatyn aılyq ótken jyly nebári 1,6%-ǵa ósti.
Modaldi jalaqy - Qazaqstanda eń kóp taralǵan jalaqy, ıaǵnı, el turǵyndarynyń basym kópshiligi alatyn tabys mólsheri.
Modaldi jalaqynyń eń kóp mólsheri taý-ken ónerkásibinde (417,7 myń teńge), IT jáne baılanys salasynda (297,5 myń teńge), logıstıkada (295,8 myń teńge) tirkeldi.
Resmı statıstıkaǵa súıensek, 2023 jyly Qazaqstandaǵy jaldamaly jumysshylardyń 60 paıyzdan astamy aıyna 300 myń teńgeden tómen jalaqy alǵan.