1999 jyly uly ǵalymnyń ǵasyrlyq toıyn merekeleý aıasynda Jezqazǵan qalasyndaǵy Metallýrg alańyna Qanysh Imantaıuly Sátbaevtyń eńseli eskertkishi ornatyldy. Sodan beri shırek ǵasyrǵa jýyq jyl saıyn týǵan kúninde qala jurtshylyǵy osy eskertkish janynda saltanatty mıtıng jasap, gúl shoqtaryn qoıý dástúrge aınalyp edi. Bıyl sol dástúrge syzat tústi. Oblys ortalyǵyndaǵy ǵalym eskertkishine gúl shoqtary qoıylmady. Nege?
О́ıtkeni, oblys ákimdigi men «Qazaqmys» arasyndaǵy memorandýmǵa sáıkes eskertkish turǵan alań qaıtadan jańartylýy tıis edi. Bul jumys ótken jyldyń 8 qazanynda oblys ákimi B.Ábdiǵalıuly men «Qazaqmys korporasııasy» JShS basqarma tóraǵasy N.Nurıevtiń qatysýymen saltanatty jaǵdaıda bastalǵan edi. Jalpy aýmaǵy 0,7 gektardy quraıtyn alańnyń 5600 sharshy metrine jol jabyny aýystyrylyp, 30 shaqty sıren, 40 shaqty jemis aǵashy otyrǵyzylýy jáne t.b. jumystar atqarylyp, 2023 jyldyń sońyna taman bitýi kerek edi.
Sodan beri alty aı ýaqyt ótti. Biraq bitken eshteńe de joq. Sonyń kesirinen bıyl jezqazǵandyqtar qaladaǵy Qanysh Sátbaev eskertkishine taǵzym etý, qurmet kórsetý múmkindiginen qaǵyldy. Oblys basshylyǵy 12 sáýir - uly ǵalymnyń 125 jyldyq mereıtoıy kúni kórshiles Sátbaev qalasyna baryp, sol qaladaǵy eskertkishke gúl shoqtaryn qoıdy. Saltanatty is-sharaǵa qatysýshylar arasynan «Qazaqmys» korporasııasy JShS basshylyǵy baıqalmady.
Bar-joǵy 0,7 gektar turatyn alańdy jarty jyldan beri jóndeı almaı jatqandar soǵys ýaqytynda 38 kúnde salynǵan zaýytqa basshylyq jasaǵandardyń biri bolǵan Qanysh Imantaıuly Sátbaevtyń rýhynyń aldynda qalaı aqtalar eken?
Jezqazǵan qalasy