QTJ arnaıy tehnıkany Qazaqstannyń basqa óńirlerinen sý basý aımaqtaryna jedel jetkizý úshin vagondar bóletinin habarlady. Tıisti tapsyrmany vıse-premer Qanat Bozymbaev berdi, dep jazady Egemen.kz.
«Temirjolshylar sý tasqyny saldaryn joıý jáne avarııalyq-qutqarý jumystaryn júrgizý úshin óńirlerge táýlik boıy arnaıy tehnıkany tasymaldaýdy uıymdastyrady.Almaty, Qaraǵandy, Mańǵystaý, Túrkistan, Qyzylorda, Shymkent, Qostanaı stansııalarynan býldozerler, traktorlar, samosvaldar, kamazdar, tıegishter, manıpýlıatorlar, sý tasqynymen kúresýge arnalǵan krandar baǵyttaldy», delingen QTJ baspasóz qyzmeti taratqan habarlamada.
Aıta ketsek, QTJ poıyzdarymen avarııalyq-qutqarý jumystaryna qatysý úshin 4 myń qutqarýshy, áskerı qyzmetshi tasymaldandy. Sý basý oryndaryna gýmanıtarlyq kómek jetkizý úshin poıyzdar quramyndaǵy vagondar bólindi.
Atyraý - Qulsary - Atyraý jáne Qulsary - Mańǵystaý baǵyttary boıynsha 12 myń adam óteýsiz negizde jolaýshylar poıyzdarymen tasymaldandy. 2 myńnan astam jolaýshy Atyraý - Mańǵystaý, Atyraý – Almaty jáne Atyraý - Astana baǵyttary boıynsha qosymsha vagondarmen shyǵaryldy. Qosymsha poıyzdar Oral — Qyzylorda, Atyraý - Qaraǵandy, Almaty — Atyraý baǵyttary boıynsha júredi, bul 2 myńnan astam jolaýshyny tasymaldaýǵa múmkindik berdi.
Odan bólek, sý tasqynynan zardap shekken aýdandardan 500 balany emdeý-saýyqtyrý ortalyqtary men balalar lagerlerine tasymaldaý uıymdastyryldy.
«Sý tasqyny kezinde eldiń keıbir aımaqtarynda temir jol jalǵyz kólik túri bolyp qalyp otyr. QTJ barlyq bólimsheleri kúsheıtilgen rejım jumysyna aýystyryldy. Sý tasqynyna qarsy is-sharalardy ýaqtyly júrgizýdiń arqasynda temirjol ınfraqurylymy zardap shekken joq, poıyzdardyń qozǵalysy keste boıynsha júzege asyrylady», deıdi QTJ ókilderi.