Elimizde energetıka máselesi ótkir tur. Ol týraly Memleket basshysy Ulttyq Quryltaıdyń úshinshi otyrysynda aıtty. Jumys istep turǵan 55 jylý kózin jóndep, keminde taǵy 6,5 myń shaqyrym ınjenerlik jelini jańǵyrtý qajettigine basa nazar aýdardy.
Jylý jáne energııamen qamtamasyz etý jaǵdaıy boıynsha el-jurttyń kókeıinde júrgen birqatar suraqqa Ortalyq kommýnıkasııalar qyzmeti alańynda Energetıka vıse-mınıstri Suńǵat Esimhanov jaýap berdi. Sóıtip, saladaǵy aýqymdy ınfraqurylymdyq bastamalardyń júzege asyrylý barysy týraly áńgimeledi. Jumys istep turǵan jylý kózderin jáne kommýnaldyq ınjenerlik jelilerdi jańǵyrtý jumysyna toqtaldy.
Qazir energetıkalyq sektordyń ınvestısııalyq tartymdylyǵyn arttyrý jáne úzdiksiz generasııalaýdy qamtamasyz etý úshin qaıtarymdy ınvestısııalardyń jyldyq lımıti 32 mlrd teńgeden 428 mlrd teńgege deıin artqan. Oǵan qosa elektr qýaty naryǵynda shekti tarıf aıyna 1 MVt úshin 590 myń teńgeden 1,065 mln teńgege deıin ulǵaıtylǵan. Sondaı-aq 24 energııa óndirýshi uıym úshin elektr energııasyna shekti tarıfter túzetildi. Onda tarıfterdiń ortasha ósýi 20%-dy qurady.
Vıse-mınıstrdiń sózine súıensek, atalǵan sharalar osy jyly salaǵa shamamen 327 mlrd teńge qarjy tartýǵa múmkindik beredi:
Elektr energııasyna tarıf esebinen aǵymdaǵy jóndeý jumystaryn júrgizýge 94 mlrd teńge; Elektr qýaty naryǵy sheńberindegi ınvestısııalar 134,7 mlrd teńge; Amortızasııalyq aýdarymdar esebinen ınvestısııalar 98 mlrd teńge.Aldaǵy jylytý maýsymyna daıyndyq úshin elektr stansalarynda 10 energoblokty, 55 qazandyqty, 45 týrbınany kúrdeli jóndeý josparlanǵan. Qazir 2 energoblokta, 7 qazandyqta, 4 týrbınada jóndeý jumystary júrgizilip jatyr. Al 1 týrbınadaǵy jóndeý jumysy aıaqtaldy. Bul jobalardy qarjylandyrý elektr jáne jylý energııasynyń tarıfi, sondaı-aq bıýdjettik qarjylandyrý esebinen qamtamasyz etilgen.
Bıyl elektr jelilerinde jalpy uzaqtyǵy 20 857 km elektr berý jelilerin, 423 birlik kishi stansany, 4 057 birlik taratý pýnktterin jáne transformatorlyq kishi stansalardy kúrdeli jóndeýden ótkizý josparlanǵan. Bularmen birge jalpy uzyndyǵy 1 619 km ulttyq elektr berý jelilerin jáne «KEGOC» AQ-nyń 30 kishi stansasyn kúrdeli jóndeý de josparda bar.
Búginde ınvestısııalyq kelisimder boıynsha Ekibastuz GRES-1-de №1 energoblokty qalpyna keltirý, Atyraý JEO-da №6 týrboagregatty aýystyrý, Topar GRES-te №3 týrboagregatty aýystyrý jumystary júrgizilip jatyr.
Aldaǵy ýaqytta Energetıka mınıstrligimen jasalǵan ınvestısııalyq kelisimder sheńberinde Ekibastuz GRES-te qýaty 600 MVt №3 blokty úsh jylda salyp bitirý kózdelip otyr. Al Qaraǵandydaǵy JEO-3-te qazandyq agregatynyń jańasyn salyp, týrbınasyn aýystyrý isin júzege asyrý eki jylǵa josparlanǵan. Oǵan qosa qýaty 85 MVt engize otyryp, jańa qazandyq agregaty men týrbınany salý arqyly О́skemen JEO-ny keńeıtý jobalary iske asyrylatyn bolady.