«Qazaqstan temir joly» UK sý basqan óńirlerdiń turǵyndaryn qaýipsiz aımaqqa kóshirýge septigin tıgizip jatyr. Atyraý – Qulsary – Atyraý, Qulsary – Mańǵystaý baǵyttary boıynsha 12 myń adam óteýsiz negizde jolaýshylar poıyzdarymen tasymaldandy. Taǵy 2 myńnan asa jolaýshy Atyraý – Mańǵystaý, Atyraý – Almaty, Atyraý – Astana baǵyttary boıynsha qosymsha vagondarmen jetkizildi.
Qosymsha poıyzdar Oral – Qyzylorda, Atyraý – Qaraǵandy, Almaty – Atyraý baǵyttary boıynsha júredi. Bul 2 myńnan asa jolaýshyny tasymaldaýǵa múmkindik berdi. Sý tasqynynan zardap shekken aýdandardan 500 balany emdeý-saýyqtyrý ortalyqtary men balalar lagerlerine tasymaldaý uıymdastyryldy.
QTJ oblys ákimdikterimen, Qorǵanys jáne tótenshe jaǵdaılar mınıstrlikterimen tyǵyz baılanysta jumys istep jatyr. Poıyzdarmen avarııalyq-qutqarý jumystaryna kómektesý úshin 4 myń qutqarýshy, áskerı qyzmetshi tasymaldandy. Buǵan qosa temirjolshylar aýyr avtomobıl tehnıkasyn tasymaldaýǵa arnalǵan vagondardy usyndy. Atyraý, Aqtóbe, Oral qalalaryna 400-den asa kólik jetkizildi. Sý basý oryndaryna gýmanıtarlyq kómek jetkizý úshin poıyzdar quramyndaǵy vagondar bólindi. Arnaıy tehnıka men gýmanıtarlyq kómekti tasymaldaý – erekshe baqylaýda.
QTJ jastary zardap shekkenderge kómek kórsetý, gýmanıtarlyq júk jınaý úshin eriktiler qozǵalysyn qurdy. QTJ-da jedel shtab jumys istep jatyr.
Temirjoldyń barlyq kúshi men quraly joǵary daıyndyqta. Sý tasqynyna qarsy is-sharalardy ýaqtyly júrgizý arqyly temirjol ınfraqurylymy zardap shekken joq, poıyzdar qozǵalysy keste boıynsha júrip jatyr. Magıstralda shaıyp ketýge qarsy 45 poıyz bar, táýlik boıy kezekshilikte 47 órt sóndirý poıyzy bar.