Qyrǵyzstan Prezıdenti Sadyr Japarovtyń Qazaqstanǵa resmı sapary aıasynda Qazaqstannyń mádenıet qaıratkerlerine memlekettik nagradalar tabystaý rásimi ótti, dep habarlaıdy Egemen.kz QR Mádenıet jáne aqparat mınıstrliginiń baspasóz qyzmetine silteme jasap.
Saltanatty is-shara barysynda Qyrǵyzstannyń Memlekettik hatshysy Súıinbek Qasmambetov mádenıet jáne óner ókilderin memlekettik nagradalarmen marapattaý ǵasyrlarǵa ulasqan dostyqtyń, ortaq mádenıettiń, damyp kele jatqan yntymaqtastyqtyń belgisi ekenin aıtty.
Qazaqstannyń belgili kompozıtory Altynbek Qorazbaevqa, tanymal estrada ánshisi, kınoaktrısa Roza Rymbaevaǵa «Qyrǵyz Respýblıkasynyń Halyq ártisi» qurmetti ataǵy berildi.
Sondaı-aq Qyrǵyzstan Prezıdenti Sadyr Japarovtyń Jarlyǵymen Qyrǵyzstan men Qazaqstan arasyndaǵy dostyq pen yntymaqtastyqty nyǵaıtýǵa qosqan eleýli úlesi úshin:
«Danaker» ordenimen - qoǵam qaıratkeri, mádenıettanýshy Murat Áýezov, aqyn Muhtar Shahanov; «Dostýk» ordenimen - pýblısıst, ádebıettanýshy, jýrnalıst, kınosynshy Saýytbek Ábdirahmanov, memleket jáne qoǵam qaıratkeri, túrkitanýshy ǵalym Myrzataı Joldasbekov, Ál-Farabı atyndaǵy Qazaq ulttyq ýnıversıtetiniń rektory Janseıt Túımebaev Qanseıituly; «Dańk» ordenimen - Halyqaralyq Túrki mádenıeti men murasy qorynyń prezıdenti Aqtoty Raıymqulova; «Dańk» medalimen - «Tań-Sholpan» kórkem-ádebı jýrnalynyń redaktorlar keńesiniń tóraǵasy, bas dırektory Dıdar Qulkenov marapattaldy.