Sý tasqyny el turǵyndaryn ábigerge saldy. Qıyn sátte Mańǵystaý oblysynyń turǵyndary kórshi Atyraý, Aqtóbe, Batys Qazaqstan oblystaryna jan-jaqty kómek uıymdastyrdy.
Aldymen Atyraý oblysyna kórshi Beıneý aýdanynyń jekelegen azamattarynyń jáne odan keıin basqa jigitterdiń jınalyp, Qulsary qalasyna kómekke attanýy jalpyhalyqtyq sıpat aldy. Qulsarydan shyqqan turǵyndardy kún-tún demeı tegin tasyp, Mańǵystaýdyń barlyq aýdan-qalasyna ornalastyrdy, evakýasııalanǵandar úshin áleýmettik nysandardan arnaıy oryndar daıyndalyp, mańǵystaýlyqtar aıaǵynan tik tura qyzmet etti. Volonterler, oblys ákimdiginen arnaıy ashylǵan qoǵamdyq kómek shtaby, «Dostyq» úıi aıasyndaǵy ózge ult ókilderi, jalpy aıtqanda, búkil halyq azyq-túlik, kıim-keshek pen ózge de qajetti buıymdardy áp-sátte jınap, qınalyp kelgen aǵaıyndy qushaǵyna basty. Qıyn sátte Mańǵystaý oblysy Atyraý oblysynan evakýasııalanǵan 27 myńnan asa adamdy qabyldady. Qulsarylyqtardy jeke úıine ornalastyrǵandar da az bolǵan joq. Solardyń biri Beıneý aýdanyna qarasty Boranqul aýlynyń turǵyny, kásipker, Beıneý aýdandyq máslıhat depýtaty Merýert Omarova Qulsary qalasynyń 250 turǵynyn óz úıinde kútti.
– Bárine tósek-ornyn daıyndap, kerek-jaraqtaryn, ystyq tamaqtaryn úlestirdik. Mal soıyp, 250 adamǵa jeterlikteı tamaq ázirledik. Atyraýlyq kelinshekter de qarap otyrmaı, bári bir jeńnen qol, bir jaǵadan bas shyǵaryp, jumyla kirisip ketti. Joldasym tiri kezinde óz qolymen, mańdaı terimen soqqan eki qabatty úsh úı jáne bir jer úıge osy 250 adam bólinip, ornalasty, – deıdi M.Omarova.
Qaıyrymdy kásipker turǵyn úıinen bólek jeke qonaqúıine 100-den asa adamdy ornalastyrǵan.
Mańǵystaýlyq qutqarýshylar da tótenshe jaǵdaı saldaryn joıý boıynsha tek Atyraý emes, Aqtóbe, Batys Qazaqstan oblystarynda qutqarý jumystaryna jumyldyryldy. Sý tasqynymen kúresý úshin Mańǵystaý oblysynyń TJD tarapynan 200 qyzmetker, 19 birlik tehnıka, 28 motopompa, 7 júzý quralynan turatyn 2 jerseriktik baılanys júıesi jáne 1 kvadrokopter jiberildi. Sondaı-aq Memleket basshysynyń tapsyrmasy boıynsha tabıǵı sıpattaǵy tótenshe jaǵdaıdy joıý jóninde sharalar qabyldaý úshin memlekettik materıaldyq rezervtiń materıaldary bronnan shyqqan edi. Atyraý oblysynan evakýasııalanǵan turǵyndarǵa arnalǵan kómek Mańǵystaýǵa jetkizildi. Kómekti túsirip alýǵa, tasyp ornalastyrýǵa áskerılermen birge eriktiler, belsendiler qatysty.
– Bizdiń óńirge, ındýstrıaldy park aýmaǵyna temirjol arqyly búgin 14 vagonǵa tıelgen kereýet pen tósek-oryn jabdyqtary jetkizildi. Mańǵystaýda sý tasqyny qaýpi joq ekeni belgili, kerisinshe, biz Atyraý oblysynan evakýasııalanǵan azamattardy qabyldap jatyrmyz. Olardyń qajettilikterin qamtamasyz etý úshin memlekettik materıaldyq rezervtiń materıaldary bronnan shyqty. Ol materıaldar evakopýnktter ornalasqan qalalar men aýdandardyń ótinimderi negizinde bólinip jatyr, – dedi Mańǵystaý oblysy Jumyldyrý daıyndyǵy jáne azamattyq qorǵaý basqarmasy basshysynyń orynbasary Kenjebek Bekmaǵambetov.
Gýmanıtarlyq kómek retinde «Azersun» óndirisiniń jáne logıstıka ortalyǵynyń aýmaǵyna 240 tonnadan asa azyq-túlik taýarlary keldi. Mańǵystaý oblysy kásipkerlik jáne saýda basqarmasy basshysynyń orynbasary Pikir Sansyzbaevtyń aıtýynsha, óńirge 4 tonna makaron, 12 tonnadan asa qaraqumyq jarmasy, 180 tonnadan asa un jáne t.b. azyq-túlik jetken.
– Mańǵystaýda azyq-túlik taýarlarynyń tapshylyǵy baıqalmaıdy. Osy qoldanǵan sharalar arqyly iske asyrylǵan jumystyń anyq kórinisi retinde mynany aıtsaq bolady: Atyraý – Aqtaý joly jabylǵan kúnderi taýarlar temirjol arqyly jetkizildi. Qazir biz azyq-túlik baǵasynyń negizsiz ósýine jol bermeý úshin baǵa monıtorıngin júrgizip jatyrmyz, – dedi ol.
Mańǵystaýdaǵy evakopýnktterdegi azamattarǵa medısınalyq, psıhologııalyq, mádenı-gýmanıtarlyq kómek jan-jaqty jáne úzdiksiz kórsetilip jatyr. Mektep jasyndaǵy balalar tolyqtaı sabaqqa tartyldy. Balalar úshin qýyrshaq teatry qoıylymdar qoısa, Oraza aıt merekesinde túrli is-shara balalarǵa arnaldy. Qyzmeti Atyraý oblysynan evakýasııalanǵan halyq arasynda kommýnıkasııalyq jáne aqparattyq jumystarǵa baǵyttalǵan qoǵamdyq shtab ókilderimen birge mańǵystaýlyq aqsaqaldar evakopýnktterde bolyp, atyraýlyqtarmen júzdesti.
Sý álegin eńserý, aldyn alý jumystary bastalǵan soń-aq Mańǵystaý oblysy ákimdiginiń jetekshiligimen «Qarajanbasmunaı» AQ, «Aqtaý teńiz saýda porty UK» AQ, «Gatın» JShS, «OndasynStroı» JShS, «As-qurylys» JShS, «Alıans LTD» JShS sııaqty ónerkásiptik kásiporyndar bólgen tehnıkalar Atyraýǵa «Qazaqstan temir joly» UK» AQ usynǵan 10 temirjol platformasyna tıeldi.
«Atyraý oblysyna 20 maman ketti. Olar osy tehnıkanyń táýlik boıy jumys isteýin qamtamasyz etedi. Qum salynǵan qaptar men ózge de qural-jabdyq jabyq vagonmen jóneltiledi», deıdi Mańǵystaý oblysynyń jolaýshylar kóligi jáne avtomobıl joldary basqarmasynyń basshysy Adaıbek Qalıev.
Mańǵystaý oblysy