Astanada «Tayelsiz Qazaqstannyn Halyq Batyrlary» qoǵamdyq birlestiginiń «Halyq batyrlary» respýblıkalyq áleýmettik-patrıottyq jýrnalynyń tusaýkeseri ótti.
Patrıotızm – otbasynan bastap qorshaǵan ortaǵa, týǵan jerge, onyń tarıhyna, mádenıetine, onda mekendeıtin halyqqa degen súıispenshilik seziminen bastalady. Otanshyl azamattardy tárbıeleý, eli men jerin qorǵaıtyn urpaq qalyptastyrý – memlekettik saıasattyń bir baǵyty, elimizdiń keleshekte turaqty damýynyń kepili. Osy oraıda «Tayelsiz Qazaqstannyn Halyq Batyrlarý» qoǵamdyq birlestigi de óskeleń urpaqtyń tárbıesine erekshe kóńil bólip, zaman talabyna saı azamat bolyp ósýine atsalysyp keledi. Bul rette halyq qaharmandarynyń, batyrlarynyń, ozyq oıly, elge syıly azamattarynyń basyn qosý arqyly eńbek etýi qoǵam múddesimen tolyq sáıkes keledi.
«Halyq batyrlary» respýblıkalyq áleýmettik-patrıottyq jýrnalynyń ómirge kelýi de osyndaı úlken maqsattardan týǵan qadam. Elordamyzdaǵy Qarýly Kúshterdiń Memlekettik áskerı-tarıhı murajaıynda ótken saltanatty is-sharaǵa belgili memleket jáne qoǵam qaıratkerleri, Qorǵanys mınıstrliginiń ókilderi qatysty.
«Tayelsiz Qazaqstannyn Halyq Batyrlarý» qoǵamdyq birlestiginiń tóraǵasy Baqytjan Ertaev jańa merzimdi basylym batyrlar men óskeleń urpaq arasyndaǵy altyn kópir rólin atqaratynyn atap ótti.
– Jýrnaldy ashý kópten oıda júrgen jospar edi. Biz kóptegen konferensııa, is-shara, kezdesý ótkizemiz. Bul is-sharalar sol mezgilde ǵana belgili bir aýmaqta BAQ-ta jaryq kóredi de, umytyla bastaıdy. Kóbi halyqtyń nazarynan tys qalady. El turǵyndary, ásirese jastar qaharmandaryn, batyrlaryn, qurmetti azamattaryn, tanymal tulǵalaryn jáne olardyń ozyq oılaryn, qajyrly eńbekterin bilýge tıis. Olardan elin, jerin súıýdi, tártipti, eńbek etýdi úırenýi kerek. Sondyqtan kóp oılanyp, aqyldasa kele osy jýrnaldy shyǵarýdy qolǵa aldyq. Negizgi maqsatymyz – jastarymyzǵa, óskeleń urpaqqa elimizdiń syıly azamattaryn, batyrlaryn úlgi etý, – dedi ol.
Halyq qaharmany qazirgi tańda jas urpaqty patrıottyq rýhta tárbıeleý ardagerler qozǵalysynyń basty baǵyttarynyń biri ekenin atap ótti. «Egemendikten búgingi kúnge deıin «Halyq qaharmany» ataǵyn alǵandar sany – 34, «Eńbek eri» ataǵyn alǵandar – 48. Onyń ishinde «Halyq qaharmany» ataǵyn alǵan 11 adam jáne «Eńbek eri» ataǵyn alǵan 37 adam ortamyzda, qoǵamdyq birlestiktiń músheleri. Bizdiń qoǵamdyq birlestigimizdiń maqsaty – osy joǵary ataqtardy alǵan adamdardyń erlik isterin nasıhattaý, ulttyq tarıhı mádenıetti qalyptastyrý úshin qoǵam men memlekettiń kúsh-jigerin biriktirý, ulttyq jadymyzdy saqtaý», dedi Baqytjan Ertaev.
Jańa jýrnaldyń alǵashqy nómiri oqyrmanǵa jol tartty. Taralymy myń danany quraıtyn túrli-tústi merzimdi basylym toqsanyna bir ret shyǵyp turmaq. Memlekettik jáne resmı tilde jaryq kóretin jýrnalda áleýmettik, ǵylymı máseleler, jastarǵa patrıottyq tárbıe berý, elge qyzmet etip júrgen eńbek adamdary jaıynda materıaldar jarııalanady.