Jaqynda Jańaózen qalasynda ashyq fýtboldan alǵash ret jarys ótip, Mańǵystaýdyń «Kaspıı» fýtbol klýby jeńiske jetkenin habardar etken edik. Aýyl turǵyndarynyń, ásirese jastardyń fýtbolǵa degen qyzyǵýshylyǵy, «Kaspıı» fýtbol klýbyna degen yqylasy Qaraqııa aýdanynyń Jetibaı aýlynda atalǵan klýb fılıalynyń ashylýyna negiz boldy.
Bul – óńir aýdandary arasynda alǵash aýdanda ashylǵan fılıal. Aýdandaǵy fýtbol sportyn odan ári damytý, jasóspirimderdiń sportqa degen qyzyǵýshylyǵyn arttyrý maqsatynda ashylǵan klýbta 2013–2015 jyly týǵan jetibaılyq jasóspirimderden quralǵan 3 top jattyǵý jumystaryn bastap ketti. Aldaǵy ýaqytta sporttyq normatıvterdi sátti tapsyrǵan oqýshylar kásibı quramǵa alynyp, Aqtaý qalasyna aýystyrylady.
«Úlken úıge ne kerek – kishi úıge de sol kerek» degendeı, fılıalǵa qajetti quraldar men sporttyq kıimderdi «Kaspıı» fýtbol klýby qamtamasyz etedi. Al qatysýshylar úshin fılıal esigi ashyq, ıaǵnı tegin. Sondaı-aq fýtbol sportyna qyzyǵyp, klýbqa tirkelgender sany kóbeıse, qosymsha toptar ashý josparlanyp otyr.
Mańǵystaý oblysy