Ulttyq statıstıka bıýrosy 22 sáýirde halyq sany jóninde jańa derek jarııalady. Onda elimizdiń etnostyq quramyndaǵy ultymyzdyń sany osy jyldyń basyna qaraı 70,98%-ǵa jetkeni kórsetilgen.
Elimizdegi qazaqtardyń jalpy sany alǵash ret 14 mıllıon adamnan asyp, 2024 jyldyń basynda 14 220 000 adamǵa jetti. Osylaısha, táýelsizdik jyldarynda elimizdegi qazaqtar sany eki esedeı ósti. Bul rette 1989 jylǵy Keńes odaǵyndaǵy sońǵy halyq sanaǵynyń deregi boıynsha qazaqtardyń úlesi 39,7% bolǵanyn aıta ketken jón.
Ulttyq statıstıka bıýrosynyń jaqynda jarııalaǵan málimetinde el óńirlerindegi etnostardyń úlesi de kórsetilgen. Máselen, 5 óńirde qazaqtardyń úlesi 80%-dan asady: Astana – 81,63%, Aqtóbe oblysynda – 85,5%, Mańǵystaý oblysynda – 91,46%, Atyraý oblysynda – 93%, Qyzylorda oblysynda – 96,2%. Taǵy 8 óńirde qazaqtardyń sany eldegi ortasha kórsetkishten kóp. Jalpy, orystar basym etnos bolyp keletin Soltústik Qazaqstan oblysynan basqa barlyq óńirde qazaqtardyń sany kópshilikti quraıdy.
Statıstıkada elimizdegi ekinshi kóp etnos orystar bolyp otyr. Olardyń sany – 2 983 317 adam. Osy oraıda orys etnosynyń úlesi bir jylda 15,18%-dan 14,89%-ǵa deıin qysqarǵany baıqaldy. Elimizdegi basqa slavıan etnostarymen qatar orystardyń sany da azaıyp keledi.
Úshinshi iri etnostyq top – ózbekter. Olardyń sany – 660 564 adam. Bul – jalpy halyqtyń 3,3% úlesi. Osy kórsetkish bir jylda 3,25%-dan ósti.
Sany boıynsha tórtinshi oryndaǵy ýkraındar 375,9 myń adamdy quraıdy. Olardyń úlesi ótken jyldyń basyndaǵy 1,92%-dan 2024 jyldyń basynda 1,88%-ǵa deıin qysqardy.
Etnostyq quramda besinshi oryndaǵy uıǵyrlardyń sany 301,6 myńǵa jetti. Al basqa etnostardyń úlesine kelsek, nemister – 1,12%, tatarlar – 1,11%, ázerbaıjandar – 0,76%, koreıler – 0,60%, túrikter – 0,45%, dúngender – 0,42%.