Elimizge resmı saparmen kelgen Ulybrıtanııa jáne Soltústik Irlandııa Qurama Koroldiginiń Syrtqy ister, dostastyq jáne halyqaralyq damý mınıstri Devıd Kemeron Astanada Premer-mınıstrdiń orynbasary – Syrtqy ister mınıstri Murat Nurtileýmen kezdesti.
Syrtqy ister mınıstrliginde Qazaqstan men Ulybrıtanııanyń syrtqy saıası vedomstvolary basshylarynyń shaǵyn jáne keńeıtilgen quramdaǵy kelissózderi ótip, birqatar ekijaqty mańyzdy qujatqa qol qoıyldy.
M.Nurtileý bul kezdesýdiń elimiz úshin mańyzdy ekenin, Qazaqstan men Ulybrıtanııa Strategııalyq seriktestik pen áriptestik jónindegi kelisimge qol qoıǵanyn málim etti.
M.Nurtileýdiń aıtýynsha, kezdesýler barysynda Qazaq-brıtan qatynasynyń kún tártibindegi máseleleri ǵana emes, aımaqtyq turaqtylyq, qaýipsizdik taqyryptary da sóz boldy. Sonymen qatar taraptar elimizde júzege asyrylyp jatqan aýqymdy áleýmettik ózgerister tóńireginde pikir almasty.
– Prezıdent Qasym-Jomart Toqaevtyń elimizdegi saıası jáne ekonomıkalyq reformalaryn qoldaǵan brıtandyq áriptesime alǵysymdy bildiremin. Kóptegen ekijaqty jáne halyqaralyq másele boıynsha eki eldiń ustanymdary uqsas. Jahandyq deńgeıdegi úrdisterdi saralap, dıalogimizdi odan ári jalǵastyrýǵa ýaǵdalastyq. Osy turǵyda brıtandyq tarap Ýkraına máselesin bólek kóterdi. О́z kezeginde áriptesime elimiz úshin kez kelgen qaqtyǵystyń beıbit jolmen sheshilýi asa mańyzdy ekenin jetkizdim. Elimiz strategııalyq beıtarap saıasat ustanyp otyrǵany aıtyldy. Eń bastysy, biz Birikken Ulttar Uıymynyń egemendik, táýelsizdik jáne aýmaqtyq tutastyq sııaqty irgeli qaǵıdattaryn sózsiz qoldaıtynymyzdy bildirdik, – dedi Syrtqy ister mınıstri Murat Nurtileý.
Sondaı-aq Murat Ábýǵalıuly eki el arasyndaǵy baılanystyń tamyry tereń ári tarıhy aıtarlyqtaı baı ekenin atap ótti.
– Qazaq-brıtan qatynasynyń tarıhy qanshalyqty aýqymdy, qyzyqty bolsa, aldaǵy ýaqytta da aıtýly jetistikterge toly bolatynyna esh kúmánimiz joq. Keıingi jyldary eki el arasyndaǵy syndarly saıası dıalog pen jan-jaqty yqpaldastyqty keńeıtýge baǵyttalǵan qomaqty ári júıeli is-áreketter qolǵa alynyp jatyr. Qos eldiń de san qyrly is-qımyldy keńeıtýge, tereńdetýge degen ortaq nıeti bar. Osy baǵytta kúsh jumyldyryp, birlese jumys isteýge daıyn ekenimizdi qýattadyq, – dedi mınıstr.
Al Ulybrıtanııa Syrtqy ister mınıstri D.Kemeron Ulybrıtanııa Qazaqstanǵa ınvestısııa quıǵan alǵashqy elderdiń biri ekenin atap ótti.
– Biz ekonomıkalyq baǵytta qarqyndy ilgerileýshilikke qol jetkizdik. Ásirese munaı salasynda úlken jetistikterimiz bar. Osy baǵyttaǵy áriptestik aıasy aldaǵy ýaqytta da keńeıe bermek. Búgin biz qat bolyp turǵan shıkizat jónindegi kelisimge qol qoıdyq, sondaı-aq Qazaqstanda osy salada jumys isteý úshin brıtandyq taý-ken kompanııalaryn tartpaqpyz. Biz bıznestiń barlyq salada qolaıly jaǵdaılarǵa ıe bolýy úshin barlyq bıýrokratııalyq kedergilerge tosqaýyl qoıyp, joıatynymyzǵa kóz jetkizýimiz kerek. О́ıtkeni aldaǵy jyldary birlese jumys isteıtin birqatar joba bar, – dedi D.Kemeron.
Kezdesý barysynda «Eır Astana» áýe kompanııasynyń jaqynda IPO-ǵa shyǵýyna jáne «Astana» halyqaralyq qarjy ortalyǵyn qurýdaǵy Ulybrıtanııanyń róli aıryqsha atap ótildi.
– Jaqynda Londonda qabyldanǵan qazba mıneraldarǵa qatysty Jol kartasyn eskerip, mańyzdy shıkizat resýrstary, Transkaspıı halyqaralyq kólik dálizin damytý jáne jasyl energııa salalarynda ozyq jobalardy júzege asyrý múmkindigin qarastyrdyq. Sonymen qatar, ǵalamdyq syn-qaterlerdi eńserý, sonyń ishinde klımattyń ózgerýine baılanysty qorshaǵan ortany qorǵaý jáne sý resýrstaryn tıimdi basqarý sııaqty baǵyttarda birlese jumys atqarýǵa kelistik. О́z kezegimizde Londonmen saýda jáne ınvestısııalyq baılanystarymyzdy keńeıtýge múddeli ekenimizdi taǵy da rastadyq, – dedi Murat Nurtileý.
Sonymen qatar ekijaqty kelissózder nátıjesinde Oksford ýnıversıtetinde qazaq tili kýrstaryn ashý týraly memorandýmǵa qol qoıyldy.
QR SIM basshysy keıingi jyldary eki el arasyndaǵy bilim berý salasyndaǵy seriktestik belsendi damyp kele jatqanyn atap ótti.
– Brıtandyq ǵylym jáne bilim berý júıesi árqashan bizdiń stýdentter men ǵalymdarǵa tartymdylyǵymen erekshelenedi. Mysaly, bıyl Londonda «Narxoz» jáne «Queen’s» ýnıversıtetteri arasynda seriktestik jáne qos dıplomdyq baǵdarlama boıynsha kelisimderge qol qoıyldy. «Primus Capital» jáne «Ardingly» kolledjderiniń ýaǵdalastyqtaryna sáıkes, Qazaqstanda eki halyqaralyq mektep ashý josparlary bar. Búgin Oksford ýnıversıtetinde qazaq tili kýrstaryn ashý týraly memorandýmǵa qol qoıyldy, – dedi Murat Nurtileý.
Budan bólek, kezdesý barysynda taraptar jahandyq syn-qaterlerdi eńserý, onyń ishinde klımattyń ózgerýine qarsy kúres, qorshaǵan ortany qorǵaý jáne sý resýrstaryn tıimdi basqarý boıynsha birlesip jumys isteýge ýaǵdalasty.