Májilis tóraǵasy Erlan Qoshanov Qytaı Halyq Respýblıkasyna resmı sapary aıasynda Úrimjige baryp, Qytaı Halyq Respýblıkasynyń Shyńjań-Uıǵyr avtonomııalyq aýdany Qytaı kommýnıstik partııa komıtetiniń hatshysy Ma Sınjýımen kezdesti.
Taraptar ekijaqty, sonyń ishinde óńiraralyq yntymaqtastyqtyń jaı-kúıi men keleshegin talqylady.
– Byltyr Prezıdent Qasym-Jomart Toqaev Shyńjań-Uıǵyr avtonomııalyq aýdanynda boldy. Odan keıin Siz Qazaqstanǵa jumys saparymen keldińiz. Bul oqıǵalar Shyńjań men Qazaqstannyń shyǵys oblystary arasyndaǵy óńiraralyq baılanystarǵa tyń serpin berdi. 1783 shaqyrymǵa sozylǵan ortaq shekaramyz bar. Oǵan qosa, osy Shyńjań aýmaǵynda bizdiń 1,6 mıllıonnan astam qandasymyz, qazaq baýyrymyz turady. Olar Qazaqstan men Qytaı arasyndaǵy «altyn kópirge» aınaldy, – dedi Erlan Qoshanov.
Májilis tóraǵasy Shyńjań Qazaqstan úshin dostas Qytaıǵa jol ashatynyn jáne bul onyń eki el arasyndaǵy máńgilik jan-jaqty strategııalyq áriptestikti nyǵaıtýdaǵy rólin kórsetetinin atap ótti.
Jıyn barysynda Májilis tóraǵasy eki eldiń depýtattary ózara kelisimder men ýaǵdalastyqtardyń oryndalý sapasyn júıeli túrde baqylaı alatynyn atap ótti. Basqosýda saýda-ekonomıkalyq saladaǵy yntymaqtastyq máseleleri de qozǵaldy.
– Qazaqstannyń Qytaımen saýda-sattyǵynyń jartysynan astamy Shyńjań-Uıǵyr avtonomııalyq aýdanyna tıesili. О́sý qarqyny kóńil qýantady. Buǵan byltyr qarasha aıynda engizilgen vızasyz rejim oń áser etkeni sózsiz. Jaqynda Prezıdent Qasym-Jomart Toqaevtyń tapsyrmasymen Úrimji qalasynda «QazTrade» saýda ókildigi ashylady. Onyń qyzmeti eki el arasynda iskerlik baılanystardy nyǵaıtýǵa baǵyttalady, – dedi Erlan Qoshanov.
Taraptar Qazaqstan aýmaǵynda elektrondy saýdany damytý úshin birlesken óńirlik qoıma ınfraqurylymyn qurý ıdeıasyn da talqylady. Sondaı-aq kólik-logıstıka, aýyl sharýashylyǵy, transshekaralyq sý resýrstary jáne týrızm salalaryndaǵy yntymaqtastyq máselelerine erekshe nazar aýdaryldy.
О́z kezeginde Ma Sınjýı Prezıdent Qasym-Jomart Toqaevtyń Shyńjań-Uıǵyr avtonomııalyq aýdanyna jasaǵan saparynyń mańyzdylyǵyna toqtaldy. Búgingi tańda Shyńjańnyń Qazaqstan óńirlerimen yntymaqtastyǵy buryn-sońdy bolmaǵan tarıhı deńgeıge jetti. Ol Qazaqstan Qytaıdyń «Bir beldeý, bir jol» jahandyq bastamasyn júzege asyrýdaǵy negizgi strategııalyq seriktesi ekenin atap ótti. Jaqyn arada «Aıagóz-Tachen» úshinshi temirjol shekara ótkeliniń qurylysy bastalady. Ol Shyńjańnyń Qazaqstannyń shekaralas oblystarymen baılanysyn odan ári keńeıtip, Qytaıdyń Ortalyq Azııaǵa altyn qaqpasy retindegi rólin nyǵaıtady.
– Qazaqstan reformalardy júıeli túrde júrgizip keledi. Biz sizder úshin qýanyshtymyz. Prezıdent Toqaev bastaǵan reformalar óz jemisin beredi dep senemiz. 2029 jylǵa qaraı Qazaqstan ekonomıkasynyń ósýi qarapaıym azamattardyń ómirine eki ese oń áser eteri sózsiz. Bul jerde Qytaı men Qazaqstannyń áleýeti baılanysty jáne bir-birin tolyqtyratyny mańyzdy. Bizdiń energetıka, aýylsharýashylyǵy, gýmanıtarlyq salada bolashaǵymyz zor, – dedi Ma Sınjýı.
Sapar barysynda Májilis delegasııasy Qytaıdaǵy eń iri aýyl sharýashylyǵy tehnıkasyn óndirýshi «Xinjiang Xinyan» kompanııasynyń qyzmetimen tanysty.