Negizgi UBT-ǵa ótinishter 6-14 mamyr aralyǵynda qabyldanady. Testileýdiń ózi 16 mamyrda bastalyp, 5 shildege deıin ótedi. Al tótenshe jaǵdaı rejımi engizilgen 6 óńir (Aqmola, Aqtóbe, Atyraý, Batys Qazaqstan, Qostanaı, Soltústik Qazaqstan oblystary) túlekteri qujattaryn 20 mamyrǵa deıin tapsyra alady, olar úshin UBT 25 mamyr men 12 shilde aralyǵynda ótkiziledi, dep jazady Egemen.kz.
QR Ǵylym jáne joǵary bilim mınıstrliginiń sheshimi boıynsha 2024 jyly talapkerler negizgi UBT-ny eki ret tapsyryp, eń úzdik nátıjemen grant konkýrsyna qatysa alady.
Eske sala keteıik, UBT-ǵa qatysý úshin Ulttyq testileý ortalyǵynyń app.testcenter.kz saıty nemese UTO qosymshasy arqyly tirkelýge bolady. Talapkerler testileý kúnin, ýaqytyn jáne pýnktin ózderi tańdaıdy. Bul rette olar eki múmkindik úshin beıindik pánderdiń bir ǵana kombınasııasyn belgileıdi.
«Talapkerlerdiń negizgi UBT-ǵa daıyndyǵyn jaqsartý maqsatynda osyǵan deıin ár pán boıynsha jeke taqyryptyq taldaý engizildi. Iаǵnı, ár UBT-dan keıin (qańtar, naýryz) túlekterge jeke taqyryptar boıynsha bilimderin arttyrý usynylady. Sonymen qatar birinshi múmkindikti tapsyrǵannan keıin olar ekinshi múmkindikke deıin daıyndyqtaryn jaqsarta alady. Odan bólek, onlaın baıqaý synaqtary iske qosylǵan. Bilim berý ortalyqtarymen birlesip uıymdastyrylǵan tegin onlaın sabaqtar uıymdastyrylyp jatyr. Al oqý jylynyń basynda UTO saıtynda test tapsyrmalary qurastyrylǵan oqýlyqtar tizimi men test jospary; «Qazaqstan tarıhy» jáne «Dúnıejúzi tarıhy» pánderi boıynsha 100 tarıhı data tizimi; «Informatıka» páninen termınder tizimi; «Qazaq ádebıeti» jáne «Orys ádebıeti» boıynsha ádebı shyǵarmalar tizimi jarııalandy», delingen UTO habarlamasynda.
Testileý formatynda ózgerister joq ekenin aıta ketý kerek. 2024 jylǵy talapkerler úsh mindetti jáne tańdaý boıynsha eki pánnen test tapsyrady. «Oqý saýattylyǵy» men «Matematıkalyq saýattylyq» mindetti pánderinen tapsyrmalar sany 5 suraqqa qysqardy. Bul beıindik pánder boıynsha suraqtar sanyn 40-qa deıin arttyrýǵa múmkindik berdi. Sonymen qatar beıindik pánderde berilgen tizimnen sáıkestikti anyqtaýǵa arnalǵan 5 tapsyrma qosyldy.
Osylaısha, UBT tapsyrmalar sany ózgerissiz qalady, jalpy 120 suraq. Onyń ishinde «Qazaqstan tarıhynan» 20 tapsyrma, «Oqý saýattylyǵynan» 10 tapsyrma, «Matematıkalyq saýattylyqtan» 10 tapsyrma jáne eki beıindik pán boıynsha 40 tapsyrma. Joǵary ball – 140, ol da ózgerissiz qaldy.
Testileýdiń jalpy ýaqyty – 4 saǵat (240 mınýt). Sonymen qatar erekshe bilim berý qajettilikteri bar balalarǵa qosymsha 40 mınýt ýaqyty saqtalady.
Test tapsyrýshylar testileý aıaqtalǵannan keıin 30 mınýt ishinde apellıasııaǵa ótinish bere alady. Sertıfıkat appelıasııalyq komıssııanyń sheshiminen keıin talapkerdiń jeke kabınetinde qoljetimdi bolady.
Shekti ball ózgergen joq: «Quqyq» jáne «Pedagogıkalyq ǵylymdar» bilim berý salalary úshin keminde 75 ball, «Densaýlyq saqtaý jáne áleýmettik qamtamasyz etý (medısına)» keminde 70 ball, «Aýyl sharýashylyǵy jáne bıoresýrstar», «Veterınarııa» keminde 60 ball (ulttyq joo úshin); ulttyq joǵary oqý oryndaryna túsý úshin keminde 65 ball, basqa joǵary oqý oryndaryna keminde 50 ball jınaý kerek.
Eskere ketetin jaıt, testileýge kirgizý kezinde qol jáne ramalyq metall izdegishter paıdalanylady. Bul talapkerlerdiń qaýipsizdigin qamtamasyz etip, erejelerdi buzý men tyıym salynǵan zattardy (uıaly telefon, shpargalka jáne t.b.) alyp ótýdiń aldyn alý úshin qajet.