Shyǵys Qazaqstan oblysynyń «Qazsýshar» fılıaly 37 myńnan astam turǵyny bar 28 eldi mekendi sý basý qaýpin seıiltti. Bul týraly Sý resýrstary jáne ırrıgasııa mınıstrliginiń resmı ókili Móldir Abdýalıeva aıtyp berdi, dep habarlaıdy Egemen.kz.
Sý qoımalarynda tasqyn sýyn qabyldaý úshin aldyn ala bos oryn daıyndalyp, sýdy ózenderge burý maqsatynda 10 bóget salyndy. Sondaı-aq sýdy arnalar arqyly burý is-sharalary uıymdastyryldy. Odan bólek, jalpy uzyndyǵy 20 shaqyrym bolatyn 10 magıstraldyq kanal mehanıkalyq ádispen tazalandy.
Búgingi tańda elimizdiń ońtústigi men batysynda sýarý maýsymyna qarqyndy daıyndyq júrip jatyr. Sý resýrstary jáne ırrıgasııa mınıstrligi aýylsharýashylyq alqaptaryna sý berýdi jaqsartý úshin alty aımaqta sýarý arnalaryn tazartady.
«Atap aıtqanda, D.Qonaev atyndaǵy Úlken Almaty kanalynyń sýarý jelileri, sondaı-aq Batys Qazaqstan, Shyǵys Qazaqstan, Qyzylorda, Túrkistan jáne Jetisý oblystaryndaǵy sýarý arnalary tazartylyp jatyr. Búgingi tańda josparlanǵan 564 shaqyrymnyń 390 shaqyrymnan astamy tazartyldy, sondaı-aq Qazaqstannyń 8 óńirinde: Jetisý, Almaty, Jambyl, Qyzylorda, Qaraǵandy, Túrkistan oblystarynda, BQO jáne ShQO-da 74 gıdrotehnıkalyq qurylysty jóndeý josparlanǵan», dedi Móldir Abdýalıeva.
Eldegi sý qoımalardaǵy jaǵdaıǵa keletin bolsaq:
Batys Qazaqstan oblysynyń tórt iri sý qoımasy orta eseppen 88,5%-ǵa toldy. Oral qalasyndaǵy Jaıyq ózeniniń deńgeıi 828 sm, ol bir táýlikte 10 sm-ge tómendedi. Aqmola oblysynda Astana jáne Sileti sý qoımalary 100%-ǵa toly. Soltústik Qazaqstan oblysyndaǵy 2 iri sý qoımasy da 100%-ǵa toly. Aqtóbe oblysynda eki iri sý qoımasynyń ortasha sý jınaý kórsetkishi - 97%. Shyǵys Qazaqstan oblysynda eki iri sý qoımasy boıynsha ortasha sý jınaý kórsetkishi shamamen - 83%. Abaı oblysynda Shúlbi sý qoımasy 39%-ǵa toldy. Qaraǵandy oblysynda 3 iri sý qoımasy 98,5%-ǵa toldy. Qostanaı oblysynda eki iri sý qoımasynyń ortasha sý jınaý kórsetkishi - 92%.«Sý qoımalaryna jınalǵan tasqyn sýy odan ári aýylsharýashylyǵy men ónerkásipte paıdalaný úshin jiberiledi», dep qosty vedomstvo ókili.