Memleket basshysy Qasym-Jomart Toqaevtyń tapsyrmasyn oryndaý aıasynda QR Úkimeti tabıǵı órtke qarsy is-qımyl júıesin nyǵaıtý jumystaryn júrgizip jatyr. Osy tusta QR Premer-mınıstri Oljas Bektenov Orman qoryn kúzetý jáne qorǵaý qyzmetin qurý týraly qaýlyǵa qol qoıdy, dep habarlaıdy Egemen.kz Úkimettiń baspasóz qyzmetine silteme jasap.
Ekologııa jáne tabıǵı resýrstar mınıstrligi janyndaǵy jańa Respýblıkalyq azamattyq qorǵaý qyzmeti TJ kezinde, onyń ishinde orman órtterin sóndirý barysynda orman sharýashylyǵy mekemeleriniń tıimdiligin arttyrýǵa múmkindik beredi.
Orman órtterine qarsy is-qımyl ormandardy kóbeıtýge jáne aǵashtardy kesýge ǵylymı tásildi, sondaı-aq keshendi aldyn alý sharalaryn qabyldaý men tıisti quzyretterdi damytýdy qajet etedi. Bólek qyzmet qurý qajettiligi osyndaı talaptardan týyndap otyr.
«Orman qoryn kúzetý jáne qorǵaý qyzmetiniń qurylýy memlekettik organdardyń alapat orman órtterine qarsy kúres sharalaryn úılestirýin jaqsartýǵa, tıisti mekemelerdi tehnıkamen jáne qural-jabdyqtarmen qamtamasyz etýdi arttyrýǵa, sondaı-aq tabıǵı órtterdiń aldyn alý jáne olardy sóndirý úshin bilikti kadrlar quramyn jasaqtaýǵa múmkindik beredi», delingen Úkimet habarlamasynda.
Qazirgi ýaqytta Qazaqstanda 15 respýblıkalyq azamattyq qorǵaý qyzmeti bar ekenin aıta ketý kerek, olar eldegi tirshilikti qamtamasyz etetin ınstıtýttardyń turaqty jumys isteýin qamtamasyz etýge arnalǵan. Olardyń qataryna О́rt sóndirý qyzmeti, Medısına qyzmeti, Hımııalyq qorǵaý qyzmeti, Injenerlik qyzmet, Radıasııadan qorǵaý qyzmeti, Ulttyq gıdrometeorologııalyq qyzmet jáne t. b. jatady.