«Bala kezimde áskerı kıim kıgen adamdardy kórsem qyzyǵa qaraıtynmyn. Teledıdardan soǵys týraly fılmderdi jıi kórip ósken býynnyń urpaǵy bolǵan soń shyǵar, jaýyngerlik ómir kishkene kezimnen-aq meni baýrap aldy. Bolashaqta el qorǵaýshy bolamyn degen balalyq armanym búginde, shyn máninde, ómirlik mamandyǵyma aınalǵanyna ózimdi baqytty sanaımyn».
Qorǵanys salasynyń maıory Erman Imanǵalıev áńgimesin osylaı bastady. Ol – búginde óńirlik qorǵanys isteri jónindegi departamenttiń jumyldyrýdy josparlaý bóliminiń basshysy. Ádette, mundaı mamandardyń qyzmeti syrt kózge baıqala bermeıdi. Shyndap kelgende, memleket ishindegi beıbitshiliktiń saqtalýyna, áskerı mindetti azamattarymyzdyń kez kelgen jaǵdaıda el qorǵaý isine saqadaı saı turýyna bul qurylymnyń sińirip otyrǵan qyzmeti zor.
«Bizdiń bólim oblystaǵy áskerı jumyldyrý daıyndyǵyn josparlaý, yqtımal soǵys jaǵdaıynda qalaı áreket etý kerektigin, qarýly kúshterimizdi úılestirip, kez kelgen áskerı qımyldy aldyn ala oılastyrýmen shuǵyldanady. Jurttyń kópshiligi qorǵanys departamenti azamattardy tek áskerge shaqyrýmen aınalysady dep oılaıdy. Deıturǵanmen áskerı qyzmet, ondaǵy qurylymdar birqatar kúrdeli úderisten quralady. Pavlodar oblysynda qorǵanys isteri jónindegi jergilikti 12 bólim bar. Beıbitshiligimizge qaýip tóndiretin qubylys týyndaı qalsa, olarda tirkelip turǵan áskerı mindetti azamattardy habarlandyryp, judyryqtaı jumyldyrý – negizgi maqsatymyz. Máselen, zapastaǵy ofıserler 60 jasqa deıin, serjanttar men qatardaǵy jaýyngerler 50 jasqa deıin áskerı mindetti bolyp esepteledi», deıdi ol.
Azamattyń balalyq armany mektep bitirgen soń birden áskerı ómirge jeteledi. Astanadaǵy ishki ister áskerinde azamattyq boryshyn ótegen soń Aqsý qalasyndaǵy qorǵanys isteri jónindegi birikken bólimine jumysqa turdy. Keıin qyzmet joly órlep, Aqtoǵaı aýdanyndaǵy jumyldyrý daıyndyǵy jáne aýmaqtyq qorǵanys bóliminiń basshysy, aýdandyq qorǵanys isteri jónindegi bólim basshysynyń orynbasary mindetterin atqardy. 2016 jyldan oblystyq qorǵanys isteri jónindegi basqarmada abyroıly eńbek etip keledi.
Erman Rashıdulynyń sózinshe, búgingi jastardyń otansúıgishtik sezimi joǵary deńgeıde. Qazirgi zamanǵy býyn kóp qundylyqty materıaldyq qajettilikpen ólsheıtinin eskersek, qorǵanys isinde jastardy yntalandyratyn tetikter jeterlik. Máselen, áskerge baryp, tártibin jaqsy jaǵynan kórsete bilse, úıine oralǵanda joǵary oqý ornynda tegin oqý múmkindigi beriledi. Moınynda nesıesi bolsa, tóleý merzimi bir jylǵa shegeriledi. Munyń syrtynda baspana alýǵa, baspana jaldap turýǵa qanshama jeńildik bar. Osynyń barlyǵy áskerge óz nıetimen barýshylar qataryn arttyra túsip otyr.
«Otansúıgishtik qasıet qanmen keledi. Ata-babalarymyzdyń erlik isteriniń rýhy bizdi árdaıym jigerlendiredi. Jasyryp keregi ne, áskerı qyzmette kóp jyl eńbek atqarǵan keıbir azamattar tezirek zeınetke shyǵyp ketsem dep júredi. Mende ondaı oı joq. Qýatym qaıtqansha osy salada eńbektenip, Otan qorǵaý isinde týǵan elime qyzmet etsem degen maqsat qana bar. Bul salada qanshama myqty mamandarmen, aǵa býynmen qyzmettes bolyp, úlgi-ónegelerin kórdim. Olardyń tájirıbelerin boıyma jınap, búginde kez kelgen tyǵyryqtan jol taýyp shyǵatyndaı deńgeıge jettim dep esepteımin. Áskerı ómir qansha qatal degenmen, aǵalardyń ystyq yqylasyn áli kúnge sezemin. Úlkenge izet, kishige qurmet kórsetý qajet. Eshqashan ashýǵa boı aldyrmaı, qyzǵanysh degen jaman qasıetterdi boıǵa darytpaý kerek. Artymyzdan ergen jas býyn bilimin shyńdap, ózi súıgen mamandyqqa bet buryp, qoǵamǵa da, ózine de paıdasy tıer jaqsy maman bolsa, odan asqan murat joq», deıdi Erman.
E.Imanǵalıev saladaǵy qajyrly eńbegi úshin Qorǵanys mınıstrligi tarapynan Alǵyshatpen marapattalǵan. Búginde jubaıymen birge otbasynda bir ul, bir qyz tárbıelep otyr. Bos ýaqytynda dzıýdo kúresimen shuǵyldanady. «Sport árdaıym sergek júrýim úshin qajet» deıdi ol.
Pavlodar oblysy