Sátbaev Ýnıversıtetiniń Áskerı is ınstıtýtynda Otan qorǵaýshylar kúni men Uly Otan soǵysyndaǵy Jeńis kúnine arnalǵan saltanatty is-shara ótti. Osy ataýly kúni ýnıversıtet ardagerleri, ofıserler men stýdentter batyrlardy eske alyp, mańyzdy merekeni atap ótý úshin jınaldy.
Jınalǵandar Áskerı kafedramen baılanysy bar jáne Sátbaev Ýnıversıtetiniń maqtanyshyna aınalǵan batyrlarǵa arnalyp jasalǵan «El esimi – el esinde» memorıaldyq eskertkishine saltanatty túrde gúl shoqtaryn qoıdy. Jıyn barysynda ardagerlerdi quttyqtaǵan Sátbaev ýnıversıtetiniń rektory Meıram Begentaev: «Injenerler qashan da Qarýly Kúshter elıtasynyń mańyzdy bóligi bolyp, olardyń tıimdiligi men qaýipsizdigin qamtamasyz etýde basty ról atqarady. Sizderdiń tereń bilimderińiz ben eren eńbekterińiz elimizde tynyshtyq pen qaýipsizdikti, azamattardyń quqyqtary men bostandyqtaryn qorǵaýdy qamtamasyz etip otyrady», dep atap ótti.
Saltanatty is-sharada ýnıversıtettiń jáne Áskerı is ınstıtýtynyń stýdenti Almasbek Ábdijámı Atyraý qalasyndaǵy sý tasqynynyń saldaryn joıý sharalaryna belsene qatysqany úshin jáne Otan qorǵaýshylar kúnine oraı Ǵylymı keńestiń sheshimimen Altyn medalmen marapattaldy.
1940 jyly qurylǵan Áskerı is ınstıtýty oqytýshylarynyń da jetistikteri erekshe atap ótildi. Munda otanǵa adal, halqymyzdyń maqtanyshy men úmiti bolatyn ınjenerler 80 jyldan bergi aralyqta áskerı daıyndyqtan ótip keledi. Áskerı ınstıtýttyń osynaý dańqty tarıhy men Ekinshi dúnıejúzilik soǵys qarý-jaraqtarynyń kórmesi uıymdastyryldy.
Mereke sońynda qatysýshylar dástúrli ásker botqasynan dám tatyp, orkestrdiń qatysýymen ótken merekelik konsertti, kýrsanttar men áskerı jattyǵý ádisterin tamashalady.
ALMATY