Shymkent qalasyndaǵy «Keń baba» saıabaǵyna tıesili jerdiń basym bóligi zańsyz jekemenshikke berilgen. Buǵan qosa qaladaǵy «Uly dala» turǵyn úı kesheni Jer kodeksiniń normalaryn buza otyryp salynyp jatyr. Bul týraly «Amanat» partııasy janyndaǵy respýblıkalyq «Jer amanaty» komıssııasy tóraǵasynyń orynbasary, Májilis depýtaty Baqytjan Bazarbek málimdedi.
Memleket basshysy Qasym-Jomart Toqaev jerdi ádil bólý máselesine erekshe nazar aýdaryp keledi. «Amanat» partııasy Prezıdenttiń qoǵamdyq tiregi retinde osy mindettiń júıeli júzege asýyna monıtorıng júrgizedi.
Shymkenttegi «Keń baba» qalalyq saıabaǵynyń irgesi sonaý 1901 jyly qalanyp, aýmaǵyna baǵaly aǵashtar, negizinen emen egilgen. Alaıda búginde saıabaq oıyn-saýyq bıznesi keńistigine aınalǵan. Ondaǵy 3,5 gektardyń 2,6 gektary zańcyz paıdalanylady. Sot sheshimine sáıkes jer memleket menshigine qaıtarylýy kerek. Baqytjan Bazarbek alda apellıasııa kezeńi kútip turǵanyn aıtty. Depýtat saıabaq aýmaǵynda zańsyz salynǵan meıramhanasy bar qonaq úı keshenine jeke toqtaldy.
«2009 jyly qala ákimdiginiń qaýlysymen 0,5664 gektar jer ýchaskesi ýaqytsha paıdalanýǵa berilip, bir jyldan keıin bul jer jekemenshikke ótip ketti. Jer kodeksine sáıkes, jalpyǵa ortaq paıdalanylatyn jerdi jekeshelendirýge bolmaıdy. Qazir bul jerde 5-qabatty meıramhana bar. Shymkent qalasynyń Jer resýrstaryn basqarý departamenti ákimdiktiń qaýlysyn zańsyz dep taný týraly talap-aryz joldap, sot alǵash ınstansııada atalǵan aryzdy qanaǵattandyrdy», dedi depýtat.
Budan soń partııalyqtar qalalyq ákimdiktiń janynan salynyp jatqan kóppáterli «Uly dala» turǵyn úı kesheniniń qurylysymen tanysty. Amanattyqtardyń aıtýynsha, qurylys kompanııasy dál osy jer ýchaskesin eshqandaı aýksıonǵa jáne konkýrsqa qatyspaı alypty.
«Jer amanaty» komıssııasy 2022 jyly qalalyq ákimdiktiń qaýlysymen 2,2 gektar jer ýchaskesi «Shymkent» Áleýmettik-kásipkerlik korporasııasy» AQ-ǵa 5 jylǵa ýaqytsha jer paıdalanýǵa berilgenin anyqtady. Budan soń ÁKK atalǵan ýchaskeni ákimdikten satyp alyp, keıin jeke qurylys kompanııasyna qaıta satypty.
«Turǵyn úı kesheni qurylysy ınvestısııalyq joba anyqtamasyna jatpaıdy. Bul degenińiz – Jer kodeksiniń 48-babyn buzý. Qurylysty toqtatý týraly zańdy kúshine engen sot sheshimi bar. Soǵan qaramastan nysan qurylysy jalǵasyp jatyr. Páterler erkin satylymda. Jergilikti bıliktiń sot sheshimin oryndaýǵa kúshi jetpeıtin sekildi», dedi Baqytjan Bazarbek.
Eske sala keteıik, buǵan deıin partııa Dendropark aýmaǵyndaǵy 0,4 gektar jer ýchaskesin memleket menshigine qaıtarýǵa atsalysty. Jalpy, byltyr Shymkenttegi «Jer amanaty» komıssııasy atqarǵan jumystyń nátıjesinde Kókbulaq turǵyn alabynda aýyl sharýashylyǵy maqsatyndaǵy 603 gektar jer memleket menshigine qaıtaryldy. Sonymen qatar qala shegindegi jalpy aýmaǵy 1,33 gektardy quraıtyn eki jer ýchaskesi de memleket menshigine ótti.
Aıta keteıik, ótken eki jylda el aýmaǵynda 10,3 mln gektarǵa jýyq jer memleket menshigine qaıtaryldy. Onyń 3 mln gektarǵa jýyǵy turǵyndarǵa bólinip berildi.
Buǵan deıin respýblıkalyq «Jer amanaty» komıssııasynyń bastamasymen árbir aýyldyq eldi mekendegi jaıylym tapshylyǵy men memleket menshigine qaıtarylǵan jer ýchaskeleriniń tizbesi kórsetilgen jerkarta.gharysh.kz ınteraktıvti kartasy ázirlendi.