«Jeńiske qurmet» marafony jalǵasty

9 qarashada Jambyl oblysynyń, Qordaı aýdanyna qarasty 40-shy «Otar» garnızonyna Elbasymyz, Qazaqstan Qarýly Kúshteriniń Joǵarǵy Bas qolbasshysy Nursultan Nazarbaevtyń bastamasymen qolǵa alynǵan «Jeńiske qurmet» marafon aksııasy kelip jetti. Uly Jeńistiń 70 jyldyǵyna arnalǵan marafon elimizdiń iri áskerı garnızondaryna, onyń ishinde Jambyl oblysyndaǵy Gvardeıskıı garnızonyna kelgen bolatyn. Osyǵan oraı, Otar aýyldyq okrýgi ortalyǵynda saltanatty mıtıng ótip, oǵan aýdan basshylyǵy, áskerıler men jaýynger ınternasıonalıster, soǵys jáne tyl ardagerleri qatysty. Otardaǵy Uly Otan soǵysy ardager­lerine arnalǵan eskertkishke gúl qoıylyp, bir mınýttyq únsizdik jarııalandy. Saltanatty shara osydan keıin garnızonnyń 30212 áskerı bóliminde jalǵasty. Sap túzegen ofıserler quramy men sarbazdar aldyna áskerı tártipke saı sarbazdar «Jeńiske qurmet» marafonynyń sımvolyn alyp shyqty. Jınalǵan qaýym aldynda 40-shy «Otar» áskerı bazasynyń bastyǵy, polkovnık D.Adyrbekov sóz sóılep, búgingi sharanyń mańyzdylyǵyna toqtaldy. «Adamzat tarıhyndaǵy eń aýyr qantógisti soǵys aıaqtalǵanyna bıyl 70 jyl tolǵaly otyr. Zaryqtyryp jetken Jeńis kúniniń qadiri bárimiz úshin tym qymbat. Bul kúni erlikke bas ıip, eldigimizge taǵzym etý – ıgi dástúrimiz. Osyndaı máńgi umytylmas tarıhı sáttiń biri – 1941-1945 jyldardaǵy Uly Otan soǵysyndaǵy Jeńis kúni», – dedi aýdan ákimi Q.Dosaev. Aýdandyq máslıhat hatshysy B.Álimbet te júrekjardy quttyqtaýyn jetkizdi. Alańda sap túzegen sarbaz­darǵa Uly Otan soǵysynyń ardageri K.Qosaqov: «Endi soǵys bolmasyn, elimizde tynyshtyq pen bereke bolsyn», – degen bataly sózin aıtty. Gvardeıskıı qalashyǵy boıynsha Aýǵanstan soǵysy ardagerleri qoǵamynyń tóraǵasy S.Nusqabaev ta sóz sóılep, áskerı rýhty joǵary ustaýǵa shaqyrdy. Áskerı bólim sarbazdary saltanatty sappen ótkennen keıin «Batys» áskerı óńirlik qolbasshylyǵy ókilderine Kerimqul aqsaqal marafon aksııasynyń sımvoly – áskerı jalaýdy tabys etti. Gvardeıskıı garnızonynyń birne­she áskerı bólimi daıyndaǵan teatr­landyrylǵan kórinister kórermen kóńilinen shyqty. Oralhan DÁÝIT, «Egemen Qazaqstan». Jambyl oblysy.