Jazý-syzýdyń aınalasyndaǵy jáne óner adamdarynyń bir sypyrasy bılıard oıynyna qumbyl keledi. Bul ózi – sıqyrly taıaǵyn asynyp, jasyl shuǵaly alqapqa aq bókendeı josyǵan aq sharlardy úrkitpeı, birtindep uıashyqqa toǵytýdan lázzat alatyn qaýym. Tipti arasynda júlgesi úzilmegen, júldesi qomaqty dástúrli týrnırler kásibı básekelerden bir kem ótpeıdi.
Astana qalasynda belgili telejýrnalıst, qoǵam qaıratkeri Nurtileý Imanǵalıulyn eske alýǵa arnalǵan jýrnalıster arasynda bılıardtan respýblıkalyq dástúrli týrnır ótti. Telejýrnalıstıka tarlanynyń esimin ulyqtaýǵa jáne jastar arasynda keńinen nasıhattaýǵa baǵyttalǵan bul ıgi is-shara osymen qatarynan tórtinshi jyl ótkizilip otyr. Buǵan deıingi týrnırlerde Nurdildá Oraz, Maqsut Erjan, Ońdasyn Meıirbaev qatarly jýrnalıster qanjyǵasyn maılap, úzdik atanǵan edi.
Jýrnalıstıkada da, bılıardta da «Keıki mergen» atanǵan televızııa darabozy Nurtileý Imanǵalıuly talaı jasqa úlgi. О́nerdegi dostary onyń tek sóztapqysh, sheshendigin ǵana emes, bılıard, voleıbol ispetti oıyndarda utqyr, mergen, sheber oıynshy ekenin de moıyndaǵan.
Nurtileý Imanǵalıuly – Jetisý oblysy Aqsý aýdany Dińgek aýylynda dúnıege kelgen. Otbasyndaǵy 14 balanyń kenjesi. Jastaıynan sportqa, sóz ónerine beıim bolypty. Qanaty qataıyp, jarty ǵasyrǵa jýyq telejýrnalıstıka qazanynda qaınap, óziniń erekshe bolmysymen, mánerimen kórermen kózaıymyna aınaldy.Telegeı ter shúmektetip eńbek etken ult perzenti muhıttan marjan súzgendeı myńjyldyqtardan bergi qundylyqtardy jýrnalıstik qarymy men darynyna ushtastyryp, qoǵamnyń ashy shyndyǵyn jetkize bildi. Ol tizgindegen «Oı-kókpar», «Betpe-bet», «Dińgek», «Qoltańba», t.b. habarlary – áli kúnge deıin kórermen jadynda. Qarashańyraq «Qazaqstan» teleradıokorporasııasynyń tóraǵasy laýazymyna deıin ósti.
«Is-sharanyń bas demeýshisi – «Tas Group» kompanııasynyń quryltaıshysy, «Assyltas» qoǵamdyq qorynyń prezıdenti, Halyqaralyq «Qazaq tili» qoǵamynyń vıse-prezıdenti, mesenat, óner janashyry Dýlat Tastekeev. Kásipker óner men sportta júrgen talaı sańlaqqa demeýshilik kórsetip keledi. Tórt jyl qatarynan uıymdastyrylyp kele jatqan Nurtileý Imanǵalıuly atyndaǵy dástúrli týrnırdiń turaqty, bas demeýshisi», deıdi týrnırdi uıymdastyrýshylar.
Is-sharanyń shymyldyǵy Nurtileý Imanǵalıulynyń rýhyna arnaýmen ashyldy. Qatysýshylarǵa aǵamyzdyń ómirlik uranyna aınalǵan «Baı qýatty bolaıyq!» degen jazýy bar sývenır syılyqtar men beısbolkalar taratyldy. Túski asta Nurtileý Imanǵalıulynyń rýhyna quran baǵyshtalyp, estelik beınerolık kórsetildi. Týrnır qorytyndysy boıynsha jeńimpaz atanǵandar men úzdik oıyn kórsetkenderge qarjylaı syılyq tabys etildi.
Jıyny 40 oıynshy qatysqan básekede bas júldeni «Qazaqstan» teleradıokorporasııasynyń qyzmetkeri, aqyn, jýrnalıst Turmaǵambet Kenjebaev enshiledi. 2-oryn jas rejısser Asylhan Manapqa buıyrdy. Al 3-júldeni belgili telejýrnalıst, «Habar» men «Qazaqstan» telearnasynda talaı jyl taban aýdarmaı qyzmet etken Álimjan Sabyrjanuly jeńip aldy. Buǵan qosa týrnırge senator Altynbek Nuhuly, belgili jýrnalıster Nesip Júnisbaı, Sádibek Túgel, Sharhan Qazyǵulov, Talǵat Eshen qatysty. Akterler qaýymynan Aıbolat Jaýdyr, Qýandyq Qystyqbaı, Nartaı Saýdanbek syndy barsha qaýymǵa belgili tulǵalar baqtaryn synady.
Is-shara barysynda qazaqtyń syı-sııapaty da qatar júrdi. Almatydan arnaıy kelgen Ardager Ýaıdın esimdi azamat Nurtileý Imanǵalıulynyń jary Qarlyǵash apamyzdyń ıyǵyna qazirgi zamanǵa saı qamzol japty.