Irannyń Qyzyl Jarty aı qoǵamy prezıdent Ibrahım Raısıdiń tikushaǵy tabylǵanyn habarlady, dep jazady Egemen.kz reseılik TASS agenttigine silteme jasap.
Izdeý-qutqarý jasaǵy Iran Prezıdenti Ibrahım Raısıdiń apatty jaǵdaıda qonǵan tikushaǵyn tapty. Bul týraly Iran Qyzyl Jarty aı qoǵamynyń basshysy Hoseın Kolıvand habarlaǵan.
Eske salaıyq, keshe, 19 mamyr kúni Iran Prezıdenti mingen tikushaq apatqa ushyrady.
Iran vıse-prezıdenti Mohsen Mansýrı Ibrahım Raısı mingen tikushaq apatty jaǵdaıda qonǵannan keıin qasyndaǵy eki adam birneshe ret baılanysqa shyqqanyn aıtty.
Raısı Shyǵys Ázerbaıjan provınsııasyna bet alǵan edi. Memlekettik teledıdar bul oqıǵa Irannyń astanasy Tegerannan soltústik-batysqa qaraı 600 shaqyrym jerde, Ázerbaıjan shekarasynda ornalasqan Djýlfa qalasynyń mańynda bolǵanyn habarlady.
Túrkııa memleketi oqıǵa ornyna 32 alpınıst pen tikushaq jiberdi.
Eýropalyq keńes tóraǵasy Sharl Mıshel bul oqıǵaǵa qatysty málimdeme jasady.
«Biz Iran Prezıdenti men syrtqy ister mınıstri mingen tikushaqtyń kútpegen jerden qonýǵa májbúr bolǵan oqıǵany baqylap otyrmyz. Olardyń jaǵdaıy áli belgisiz», dep jazdy Sharl Mıshel X áleýmettik jelisinde.
Sondaı-aq Reseı Prezıdenti Vladımır Pýtın apatty jaǵdaıda qonǵan tikushaqty izdeýge kómektesý maqsatynda oqıǵa ornyna 50 qutqarýshyny, eki ushaq pen bir tikushaq jiberdi.