On myńǵa jýyq halyq tirshilik etetin Kegen aýyldyq okrýginiń áleýmettik-ekonomıkalyq ahýaly aı aýnap, jyl ótken saıyn artyp keledi desek asyra aıtqandyq emes. Kósheleri kóriktenip, túngi shamdar samaladaı jarqyrap kóńil qýantady.
Aýyl ortalyǵy ýaqyt talabyna saı damyp keledi. Mysalǵa aıtsaq, birer jyl buryn ashylǵan «Jastar» stadıonynda serýendeıtinder qatary kóbeıgen. Bıylǵy jyly paıdalanýǵa berilgen «Jastar resýrstyq ortalyǵy» ǵımaraty da aýylǵa ajar qosýmen qatar, jastardyń eńsesin tiktep, eseli eńbek etýine oń áserin tıgizgen. Aýyldyń gúldep, kórkeıe túskenine turǵyndar da dán rıza.
«Joǵary oqý ornyn bitirip, aýylyma kelip eńbekke aralasýdamyn. Sán-saltanaty jarasqan «Jastar resýrstyq ortalyǵynda» aýdan jastary jumysqa ornalasý, kásip bastaý, memlekettik baǵdarlamalar boıynsha da keńester alady. Kórmeler men sheberlik sabaqtary, kezdesýler uıymdastyrylyp, tanymdyq kókjıekterin keńeıtip keledi», deıdi ortalyqtyń jas mamany Ádil Telman.
Aýdan ortalyǵynda irgetasy kóp jyldar buryn qalanǵan qosqabatty turǵyn úıler bar. Bıylǵy jyly kópqabatty 5 turǵyn úıdiń aǵymdaǵy jóndeý jumystaryna 135 mln teńge qarajat qaralyp, memlekettik satyp alýdyń ashyq konkýrsy jarııalanyp, jeńimpaz kompanııa jóndeý jumystaryn bastaǵan.
Sonymen qatar aýyl irgesindegi polıgonnyń qorshaýyna 60 mln teńge qarajat bólingenin jáne kóktemgi abattandyrý jumystarynyń da uıymshyldyqpen júzege asyrylǵanyn ataǵan Kegen aýyldyq okrýginiń ákimi Rýslan Keńesjanuly aýylda mal basynyń artyp kele jatqanyn aıtty.
Kegen aýylynda kásipkerlik keńeıip, jańa jumys oryndary ashylǵan. «Aýyl amanaty» baǵdarlamasyna ótinim bergen azamattar aldaǵy ýaqytta jıhaz jasaý ortalyǵyn, jylyjaı óndirisin iske qosýǵa nıetti.
Al 80-niń seńgirine shyqqan Ábiljan Árishov aqsaqal jetekshilik etetin «Ersin» sharýa qojalyǵy 121 mln teńgege lızıngke 1357 bas «Edilbaı» qoıyn alyp, ósirýde. Qoı tóldetý naýqanyn sátti aıaqtaǵan.
Bıyl «Aýyl amanaty» baǵdarlamasy boıynsha 2,5 paıyzdyq nesıe alyp, jumys júrgizý úshin aýyldyq okrýg ákiminiń apparaty mamandarynyń kómegimen 4 kooperatıvtiń nesıe qujattamalary daıyndalyp, «Qonaev» áleýmettik-kásipkerlik korporasııasyna joldanǵan. Nátıjesinde 3 kooperatıvke 86 mln 500 myń teńge nesıe maquldanǵan.
Sonyń biri «Kegen AgroMash» aýylsharýashylyq óndiristik kooperatıvi qýaty joǵary 2 «YUTO» traktoryn aldy.
«Kóktemgi, kúzgi dala jumystarynda tehnıka jetispeýshiligin aıqyn sezinemiz. Sol sebepti, «Aýyl amanaty» baǵdarlamasymen 27 600 000 teńgege 2 traktordy jer jyrtý, óńdeý, shóp shabý, tyrmalaý agregattarymen alyp, bank qarajaty esebinen aýylymyzǵa ınvestısııa salyp otyrmyz. Dese de, tehnıka alynǵanmen ıgeretin jer tapshylyǵyn jasyrǵymyz joq. Eger shabyndyq pen egistik jerdiń kólemi ulǵaısa bul tehnıkanyń qyrýar paıdasyn kóretin bolamyz», deıdi kooperatıv basshysy Syrym Saǵynbekov.
Kegen aýyldyq okrýginde kóktemgi dala jumystary boıynsha jospar 635 gektar jazdyq arpa men bıdaıdy quraıdy. Búgingi kúnge arpa-bıdaı egý úshin 658 gektar jer jyrtylyp, ıaǵnı jospar 104 paıyzǵa oryndalyp, dándi-daqyldar sebilýde.
Almaty oblysy.