18 mamyrǵa qaraǵan túni Bishkektegi tártipsizdikter saldarynan zardap shekkenderdiń sany artty, dep habarlaıdy Egemen.kz 24.kg saıtyna silteme jasap.
Qyrǵyzstan Densaýlyq saqtaý mınıstrliginiń málimetinshe, sheteldiktermen bolǵan jappaı tóbelestiń saldarynan 41 zardap shegýshi medısınalyq kómekke júgingen.
Zardap shekken 11 adam aýrýhanada em qabyldap jatyr. Qalalyq jedel járdem aýrýhanasynda eki naýqas jatyr. Bireýi bas súıeginiń jabyq jaraqatyn alǵan, ekinshisiniń jambas súıegi synǵan. Naýqastardyń jaǵdaıy turaqty dep baǵalandy.
Bir zardap shegýshi Ulttyq aýrýhananyń jaq-bet hırýrgııasy bóliminde emdelýin jalǵastyryp jatyr. Onyń jaǵdaıy salystyrmaly túrde qanaǵattanarlyq dep baǵalandy.
Densaýlyq saqtaý mınıstrligi 19 mamyrda taǵy segiz sheteldiktiń medısınalyq kómekke júginip, Halyqaralyq medısına ýnıversıtetiniń klınıkasyna jatqyzylǵanyn atap ótti. Ekeýiniń murny synǵan, qalǵandarynda jabyq bas jaraqattary, kógergen jáne sydyrylǵan degen dıagnoz qoıylǵan. Olardyń barlyǵy dárigerlerdiń baqylaýynda, jaǵdaıy salystyrmaly túrde qanaǵattanarlyq dep baǵalanyp otyr. Olardyń qal-jaǵdaıyn bilýge Qyrǵyzstannyń Densaýlyq saqtaý mınıstri Alymqadyr Beıshenalıev bardy.
«Prezıdent Sadyr Japarovtyń ókimimen zardap shekkenderdi emdeýge jáne qajetti dári-dármekpen qamtamasyz etýge jumsalatyn barlyq shyǵyndar tegin bolady», dedi Densaýlyq saqtaý mınıstri Alymqadyr Beıshenalıev.
Al, Bilim jáne ǵylym vıse-mınıstri Rasýl Abazbek ýýlý Qyrǵyzstandaǵy sheteldik stýdentter ýaqytsha onlaın oqytýǵa kóshkenin aıtty. Onyń aıtýynsha, bir aptadan beri qashyqtan oqytý týraly buıryq shyqqan. Mundaı sharalar stýdentterdiń jataqhanada jáne basqa da turǵylyqty jerinde turý múmkindigin qamtamasyz etý úshin qolǵa alynǵan.
Esterińizge sala keteıik, 18 mamyrǵa qaraǵan túni Bishkekte jergilikti turǵyndar men sheteldik stýdentterdiń arasynda qaqtyǵys bolǵan. Jataqhanalardyń birinde sheteldiktermen tóbeles bolǵanyn estigen birneshe júz adam tóbelespek bolǵan.