Senatta 2023 jylǵy respýblıkalyq bıýdjettiń atqarylýy týraly Úkimet pen Joǵary aýdıtorlyq palatanyń esepteri tanystyryldy. Qarjy mınıstriniń orynbasary Dáýren Temirbekov pen Joǵary aýdıtorlyq palatanyń múshesi Nurlan Nurjanov Senat depýtattarynyń aldynda baıandama jasady, dep jazady Egemen.kz.
Qarjy mınıstri orynbasarynyń aıtýynsha, elimizdiń ekonomıkalyq damýyn kórsetetin negizgi kórsetkishterdiń biri – ishki jalpy ónimniń ósýi bolyp tabylady, ol 2023 jyly 5,1% qurady. Bul ósim óńdeý ónerkásibindegi, qurylys salasyndaǵy, saýdadaǵy óndiristiń ulǵaıýyna, sondaı-aq kólik salasyndaǵy qyzmet kóleminiń ósýine baılanysty bolyp otyr.
Dáýren Temirbekov sonymen qatar yntymaqty zeınetaqy mólsheri 10,5%-ǵa ındekstelgenin, sondaı-aq birqatar memlekettik áleýmettik járdemaqylardyń, onyń ishinde múgedektigi jáne asyraýshysynan aıyrylý jaǵdaıy boıynsha járdemaqylardyń mólsheri ulǵaıtylǵanyn atap ótti. Bıýdjet shyǵysyndaǵy zeınetaqy tólemine arnalǵan qarjynyń jalpy somasy 3 mlrd 313 mln teńgeden asty jáne 2,3 mıllıon zeınetkerdiń laıyqty ómir súrý deńgeıin qamtamasyz etip otyr.
Joǵary aýdıtorlyq palatanyń múshesi Nurlan Nurjanov óz kezeginde geosaıası dúrbeleńder pen syrtqy qaýip-qaterlerge qaramastan elimizdiń ekonomıkasy óse túskenin atap ótti. Ekonomıkanyń kóptegen salalarynda oń nátıjege qol jetti. Al aýyl sharýashylyǵynda tabıǵı jáne ishinara klımattyq apattarǵa baılanysty 7,7% tómendeý baıqalyp otyr.
Palata múshesiniń aıtýynsha, ótken jyldaǵy basty máseleniń biri – jumyspen qamtý boldy. Qazaqstanda ózin-ózi jumyspen qamtyǵan turǵyndardyń úlesi 22,2% qurady. Olardyń 60%-dan astamy jınaqtaýshy zeınetaqy júıesimen qamtylmaǵan. Ashylǵan jumys oryndarynyń kópshiligi ýaqytsha bolǵandyqtan áleýmettik qorǵaý aıasynan jeke azamattardyń tys qalýy ulǵaıa tústi. Osyǵan baılanysty, Joǵary aýdıtorlyq palata Úkimetke turaqty jumyspen qamtýdy qamtamasyz etý jáne turaqty jumys oryndarynyń sanyn ulǵaıtý jóninde sharalar qabyldaýdy usyndy.