Almatyda «Mass Alert» jer silkinisin eskertý júıesi bıyl maýsym aıynda iske qosylady. Bul júıe Memleket basshysyna naýryz aıynda tanystyrylǵan edi.
Almaty qalasynyń ákimi Erbolat Dosaevtyń aıtýynsha, qanatqaqty rejimde iske qosylatyn «Mass Alert» jelige qosymsha júkteme týǵyzbaıdy. «Cell Broadcast» tehnologııasynyń kómegimen júzege asatyn «Mass Alert» júıesi abonementke jer silkinisiniń bolatyny týraly shuǵyl habarlama jetkizýde zamanaýı múmkindikterimen erekshelenedi.
Osy rette ǵımarattardyń seısmıkalyq jaǵdaıyna baılanysty iske asyp jatqan sharalarǵa toqtalǵan О́nerkásip jáne qurylys mınıstri Qanat Sharlapaev seısmıkalyq deńgeıi 7-9 ball bolatyn alańdarda turǵyn úıler men áleýmettik nysandar salý kezinde seısmıkalyq oqshaýlaýdyń mindetti júıesi engiziletinin habarlady. Osyǵan baılanysty normatıvtik-tehnıkalyq qujattarǵa tıisti túzetýler ázirlendi. Osy oraıda vıse-premer Qanat Bozymbaev halyqaralyq tájirıbeni, onyń ishinde japon eliniń tájirıbesin eskere otyryp, seısmıkalyq qaýipti óńirlerdegi nysandardy jobalaý kezinde normalardy qatańdatýdy, sondaı-aq olardyń akkredıttelgen zerthanalardy qoldanýmen sáıkestigin qadaǵalaýdy kúsheıtýdi tapsyrdy.
Seısmologııalyq baqylaý jáne zertteý ulttyq ǵylymı ortalyǵynyń dırektory Dáýlet Sársenbaevtyń aıtýynsha, byltyr seısmostansalardy jóndeý úshin jarty mıllıard teńgeden astam qarjyǵa jabdyqtar satyp alynǵan. Nysanaly qarjylandyrý baǵdarlamasy boıynsha 25 baqylaý beketi ashyldy. Sonymen qatar 10 stansa ishinara jańǵyrtylyp, altysy jańadan iske qosyldy. Turǵyndar men zańdy tulǵalardyń ótinishteri boıynsha 23 qańtardaǵy jer silkinisinen keıin 183 nysanǵa tekserý júrgizilgen. Al 4 naýryzdaǵy jer silkinisinen keıin túsken ótinishterge sáıkes 300-den astam nysandy keshendi zertteý bastalyp, bıylǵy jyldyń sońyna deıin 13 myńnan astamyna seısmo-aýdıt júrgizý josparlanyp otyr.
ALMATY