Senat depýtattary Darhan Qydyráli men Álisher Satvaldıev Túrki memleketteri Parlamenttik Assambleıasy Ulttyq qorǵanys komıtetteri tóraǵalarynyń alǵashqy otyrysyna qatysty. Otyrysqa qatysýshylar TúrkPA-ǵa múshe memleketter arasyndaǵy qorǵanys jáne qaýipsizdik salalaryndaǵy ózara is-qımyldy kúsheıtý máselelerin talqylady, dep habarlaıdy Egemen.kz joǵarǵy Palatanyń baspasóz qyzmetine silteme jasap.
Senator Darhan Qydyráli óz sózinde geosaıası shıelenis pen qarýly qaqtyǵystardyń, saýda soǵystarynyń jáne terrorızmniń kúsheıe túsýimen qatar búgingi álem eleýli problemalarǵa tap bolyp otyrǵanyn atap ótti. Sondyqtan qaýipsizdik máselesi jahandyq kún tártibin qalyptastyrýda sheshýshi ról atqarady. Atalǵan problema búkil álemge ortaq bolǵandyqtan qaýip-qaterge qarsy turýda birlesken sheshim izdestirý qajet.
«Qazaqstan túrki áleminiń ár memleketimen tyǵyz qarym-qatynasqa erekshe nazar aýdaryp keledi. Bul Qazaqstannyń syrtqy saıasatynyń basym baǵyttarynyń biri. Parlamentshi retinde biz el ishindegi reformalardy zańdy túrde iske asyrýdy, sondaı-aq halyqaralyq bastamalardy ilgeriletý máselelerin qamtamasyz etemiz. TúrkPA – túrki yntymaqtastyǵynda mańyzdy halyqaralyq alań bolyp tabylady. Bul túrki tildes elderdiń mádenı, ekonomıkalyq jáne gýmanıtarlyq salalardaǵy baılanystaryn saralaýǵa, damytýǵa, sondaı-aq túrki memleketteriniń yqpaldastyǵyn arttyrýǵa járdemdesedi», dedi Darhan Qydyráli.
Odan bólek senatorlar Ankara qalasyndaǵy Qorǵanys ónerkásibi basqarmasynda da boldy.