Almatyda Shanhaı Yntymaqtastyq Uıymyna múshe memleketterdiń dene shynyqtyrý jáne sport salasyna jaýapty mınıstrlik basshylarynyń keńesi ótti. ShYU-ǵa múshe memleketter arasyndaǵy áriptestikti odan ári damytý men nyǵaıtýdyń mańyzdy máseleleri talqylanǵan jıynda sala mınıstri Ermek Marjyqpaev sport – ShYU aıasyndaǵy ózara is-qımyldyń negizgi baǵyttarynyń biri ekenin atap, Qazaqstan ShYU keńistiginde sporttyń damýyna úles qosýǵa múddeli ekenin jetkizdi, dep habarlaıdy Egemen.kz atalǵan mınıstrliktiń baspasóz qyzmetine silteme jasap.
Mınıstr Qazaqstannyń memlekettik saıasatynyń mańyzdy baǵytynyń biri – buqaralyq sportty damytý ekenin aıtty. Búgingi kúni dene shynyqtyrýmen jáne sportpen júıeli túrde aınalysatyndar halyqtyń jalpy sanynyń 40,4 %-yn quraıdy. 2021 jyldan bastap sport seksııalaryn jan basyna qarjylandyrý arqyly memlekettik sport tapsyrysyn iske asyrý tetigi engizildi. Nátıjesinde osy kúni 240 myń bala men jasóspirim 7 myńnan astam sport seksııasyna tegin barady.
«Tájirıbe almasý jáne jańa bastamalardy talqylaý arqyly biz uıym keńistiginde ǵana emes, álemde de birlesken kúsh-jigermen sporttyq kún tártibin qalyptastyra alamyz. Sonymen qatar bizdiń sportshylar sport básekelerinde bir-birine negizgi qarsylastar sanalady. Dese de, dál osyndaı básekelestik bizdiń sportshylarymyzdyń tájirıbesin arttyrýǵa zor múmkindik beredi», dedi Ermek Marjyqpaev.
Aıta ketken jón, 2023 jyly Qazaqstan sportshylary ShYU-ǵa múshe memleketter aýmaǵynda 50-den astam jattyǵý jıynyn ótkizgen.
Is-sharaǵa qatysýshylar birlesken oqý-jattyǵý jıyndaryn ótkizý týraly ıdeıalaryn aıtyp, sporttyq medısına men ǵylym salasynda tájirıbe almasý jáne yntymaqtastyq máselelerin talqylady.
Jıyn sońynda Ermek Marjyqpaev ShYU-ǵa múshe memleketterdiń dene shynyqtyrý men sport salasyna jaýapty mınıstrlik basshylaryn bıyl qyrkúıek aıynyń 8-13 kúnderi aralyǵynda Astanada ótetin 5-shi Dúnıejúzilik kóshpendiler oıyndaryna qatysýǵa shaqyrdy.