Qazaq mýzykasyna, ásirese kúı ónerine Sáken Seıfýllınniń qosqan úlesi az emes. Jalǵyz-aq Ábiken Hasenuly ekeýiniń dos-jar bolǵanyn, asharshylyq jyldary Arqadan Almatyǵa jetip jany qalǵan kúıshini qamqorlyǵyna alyp, baǵyt kórsetkenin, Zataevıchtiń «Qazaqtyń 1000 áni» jınaǵyna birneshe án-kúı jazdyrǵanyn atasa da jetkilikti shyǵar. Qatelespesek, sonyń biri – «Abylaı han atty áskeriniń marshy» dep atalady. Mýzykalyq muramyzǵa osynshama janashyrlyqpen qaraǵan, ózi de sazger Sákenniń 130 jyldyǵyna oraılastyrylǵan «Kúı qudireti» atty jas kúıshilerdiń qalalyq baıqaýy Astanadaǵy S.Seıfýllın murajaıynda ótti.
Qalalyq demeseńiz, joǵary deńgeıde uıymdastyrylǵan jas kúıshiler baıqaýy respýblıka kólemin qamtydy dese, artyq emes. Baıqaýǵa qatysýshy dombyrashylardyń deni K.Baıseıitova atyndaǵy Qazaq ulttyq óner ýnıversıteti men kolledjder stýdentteri jáne óner mektepteriniń oqýshylary. Saıys Arqa kúıshilik ónerinen bolǵandyqtan, shertpe kúıdiń tuma basynda Táttimbet turǵan soń, Qaraǵandydaǵy kúıshi atyndaǵy óner kolledjinen ónerpazdar kelip qatysty. Bas-aıaǵy jıyrma úsh jas dombyrashy baıqaý sharty boıynsha birinshi kezekte eki kúıden oryndap shyqty. Munda Táttimbet, Toqa, Itaıaq, Qyzdarbek, Ábdılerdiń shyǵarmashylyǵymen qosa, sırek oryndalatyn Sarmantaıdyń Ahmetjanynyń «58» atty qasiret kúıi, Sákenniń ákesi Seıfollanyń «Qosbasary», Aqqyzdyń týyndylary tartyldy. Astana qalasy ákimdiginiń «Birlesken murajaılar dıreksııasy», Sáken Seıfýllın mýzeıi uıymdastyrarda K.Baıseıitova atyndaǵy Qazaq ulttyq óner ýnıversıtetiniń kúıshilerimen keńesip pishkeni baıqalady. Qatysýshy ónerpazdar birinen biri ótedi. Táttimbet pen Toqa syndy nebir eren kúıshilerdiń sırek oryndalatyn shyǵarmalaryn oryndap otyrdy. Talapty jastardyń ónerin baǵalaýshy qazylar alqasynyń tóraǵasy – Mádenıet qaıratkeri, «Halyq kúıshisi» medaliniń ıegeri, kúıshi-kompozıtor Ahat Baıbosynov, quramynda – Qazaqstannyń eńbek sińirgen qaıratkeri, professor Janǵalı Júzbaı, Qazaqstannyń eńbek sińirgen qaıratkeri, Qazaq ulttyq óner ýnıversıtetiniń Dombyra kafedrasynyń meńgerýshisi Abylǵazy Ahmadıev, Mádenıet salasynyń úzdigi, respýblıkalyq Táttimbet konkýrsynyń bas júldegeri Qaırat Aıtbaev, Mádenıet salasynyń úzdigi, Qazaq ulttyq óner ýnıversıtetiniń oqytýshysy Erbolat Sapýanov, Táttimbet óner kolledjiniń ustazy, respýblıkalyq shertpe kúı konkýrsynyń bas júldegeri Madııar Súleımenov bar.
«Sákenniń mereıtoıymen qatar baıqaý 31 mamyr – Saıası qýǵyn súrgin jáne asharshylyq qurbandaryn eske alý kúni qarsańyna da keledi. Sebebi kúıshilerdiń kóbi 1928-1930 jyldardyń basynda atylyp ketti. Onyń ústine Sáken kúıdi óte qatty jaqsy kórip, qasterlegen. Keıingi urpaqqa amanattaǵan. Qazaqtyń naızasy qandaı ótkir bolsa, dombyrasy odan kem túspegen. Halyq kúı tyńdap rýhtanǵan. Áıtpese, «Abylaı han atty áskeriniń marshyn» qaldyryp, amanattamas edi», dep quttyqtaý sózin tarıh ǵylymdarynyń doktory, Sáken mýzeıiniń dırektory Marat Ábsemetov sóıledi.
Ne kerek, jas dombyrashylardyń kóbi qazaqtyń kúı ónerin sheber meńgergenge uqsady. Jetkinshek jastar maıystyryp dombyra shertkende janyń kiredi. Sonymen qatar murajaıdyń shaǵyn zalynda dombyra úni daýys zoraıtqyshsyz-aq kúmbirlep tamasha estiledi. О́tkende bir ónertanýshylar kúı konsertin úlken zaldardan góri kıiz úı syndy kishirek oryndarda ótkerse, shyraıy sonda kiredi degen sózdiń dálelin osy baıqaý kórsetkendeı. Kúıshi qazylar da «myna jer tamasha eken, árbir qaǵys anyq estiledi», dep otyrǵandaryn estip qaldyq. Demek dombyranyń daýsy da kúı talǵaıdy degen sóz.
Sonymen qazylar alqasynyń sheshimimen baıqaýdyń bas júldesin Nurbolat Tapalov esimdi ónerpaz jeńip aldy. Júldeli birinshi oryndy Bekzada Dostııarova ıelendi. Ekinshi, úshinshi oryn Temirlan Kýbat pen Seıdáli Baýyrjanǵa buıyrdy. Jeńimpazdarǵa dıplom jáne aqshalaı syılyqtar tapsyryldy.
Astana qalasy Saryarqa aýdandyq ákimdigi, Sáken Seıfýllınniń naǵashy qaryndasy Asylgúl Ábish, kásipker Erýbaı Isataev is-sharaǵa demeýshilik etkenin atap ótken lázim.