Jer-jerlerde ótip jatqan «Taza Qazaqstan» aksııasyna Shyǵys Qazaqstannyń azamattary da belsene qatysyp júr. Jalǵasyn tapqan naýqan bul joly Ulan aýdany aýmaǵyndaǵy Shybyndy kóldiń jaǵasynda uıymdastyryldy.
Buǵan deıin «Taza Qazaqstan» respýblıkalyq aksııasy aıasynda Sibe kóliniń aınalasy, Aqbaýyr tarıhı orny qoqystan tazartyldy. Keıbir azamattardyń mádenı sanasy joǵary bolyp, kúl-qoqys shashpaı júrse, qap-qap qoqys jınalmas edi. О́kinishtisi, jaǵajaılardy, kórikti tabıǵat aıasyn bos shólmek, polıetılen bótelke syndy zııandy zattar basyp ketken. Munyń bárin ádettegi bir rettik senbilikte tazalap alý múmkin emes edi. Bıylǵy aıdan aıǵa sozylyp jatqan «Taza Qazaqstan» aksııasy tabıǵattyń tazarýyna shynaıy septigin tıgizdi. Tazalyq jumystarynan bólek oblys aýmaǵynda myńdaǵan kóshet otyrǵyzyldy.
Bul joly Shybyndy kól aýmaǵyn tazartýdyń birden bir sebebi, kanıkýl bastala sala bul mańda jazǵy oqýshylar lageri uıymdastyrylady. Qalaǵa taıaý jer bolǵandyqtan, tabıǵattan saıa izdegender de Shybyndy kólin betke alady.
– «Taza Qazaqstan» aksııasy bastalǵaly belsene qatysyp júrmiz. Bylaı bilinbeıtin shyǵar, jol boıynda, ózen-kólderdiń jaǵalaýynda qoqys óte kóp. Sonyń bárin shashatyn – ózimiz. Aıtarym, tabıǵatta demaldyńyz ba, qoqystaryńyzdy alyp ketińizder! Tazalyqty ózimizden bastaıyq, – deıdi ekologııalyq aksııalarǵa belsene qatysyp júrgen Saıat Jaqyp.
Ulan aýdanynda uıymdastyrylǵan tazalyq aksııasyna 50 shaqty adam qatysty. Olardyń ishinde stýdentter, mektep oqýshylary, jastar uıymdarynyń músheleri, eko-belsendiler, eriktiler bar. Konserttik baǵdarlamalarmen bastalǵan aksııaǵa shetelden kelgen sportshylar da belsene atsalysty.
– Qazaqstannyń, sonyń ishinde Shyǵys Qazaqstannyń tabıǵaty erekshe kórkem. Osyndaı sulýlyqty árbireýimiz aıalaı bilýimiz kerek. Aıalaý degenimiz, op-ońaı, qolyńdaǵy qoqysty dalaǵa tastama. Bar bolǵany – sol. О́zim búgingi aksııaǵa qatysqanyma qýanyp turmyn. Uıymdastyrýshylarǵa rahmet, – deıdi Stokgolmnen kelgen sportshy Iogan Martenson.
Aıta keteıik, aınaldyrǵan eki saǵat ishinde sportshylar ǵana 50 qap qoqys jınap, kól aınalasyn aınadaı tap taza etti. Is-shara sońynda ortaǵa úıilgen qaptar arnaıy orynǵa aparyp tógildi. Al aksııaǵa qatysqandardyń baryp qaıtýyn Ulan aýdany ákimdigi uıymdastyrdy.
Shyǵys Qazaqstan oblysy,
Ulan aýdany