Astananyń 11-synyp oqýshysy Marlen Kósherbaı erligimen kózge túsip, ózenge bata jazdaǵan búldirshindi qutqaryp qaldy, dep habarlaıdy Egemen.kz elorda ákimdiginiń resmı saıtyna silteme jasap.
Marlen Kósherbaı - №52 mektep-gımnazııasynyń 11 «A» synyp oqýshysy.
12 mamyr kúni saǵat 11 shamasynda Marlendi qaryndasy oıatyp, ózenge bir balanyń batyp bara jatqanyn jetkizgen. Marlen birden úıdiń janyndaǵy ózenge qaraı júgirip, sýǵa batyp bara jatqan búldirshindi aman-esen shyǵaryp aldy.
Beıbit zamannyń batyry óz sózinde kishkentaı balanyń ólim men ómirdiń ortasynda turǵanyn kórgende, oılanbastan kómekke umtylǵanyn aıtty.
Búgin Marlen kórsetken erligi men batyldyǵy úshin Astana qalasy bilim basqarmasy men Aqmola oblysynyń TJ departamentiniń atynan marapattaldy.