Senat tóraǵasy, Qazaqstan bochcha federasııasynyń prezıdenti Máýlen Áshimbaev bochchadan dástúrli el chempıonatynyń jabylý rásimine qatysty. Bes kúnge jalǵasqan saıysta elimizdiń úzdik bochchashylary anyqtaldy.
Máýlen Áshimbaev jarystyń tartysty ótýine úlken úles qosqan parasportshylarǵa alǵys bildirip, ár atlettiń daıyndyǵy joǵary deńgeıde bolǵanyn atap ótti. Osy rette bıyl chempıonatqa qatysýshylar sany byltyrǵymen salystyrǵanda eki esege artqanyn aıta ketken jón.
«Bıyl chempıonatty uıymdastyrý deńgeıi, sportshylardyń daıyndyǵy jáne qatysýshylar sany aıtarlyqtaı artqanyn aıryqsha atap ótkim keledi. Osyǵan oraı Federasııanyń jáne jeke óz atymnan barshańyzǵa alǵysymdy bildiremin. Munyń bári – Prezıdentimiz Qasym-Jomart Kemeluly Toqaevtyń ınklıýzıvti qoǵam qalyptastyrýǵa arnalǵan saıasatynyń nátıjesi. Sondaı-aq biz sportshylarymyzdyń kásibı turǵyda óskenine erekshe qýanyshtymyz. Bul úzdiksiz jattyǵý men tabandylyqtyń arqasy ekeni anyq. Sizderdiń árqaısyńyz osy chempıonatqa qatysý arqyly mol tájirıbe jınap, burynǵydan da myqty, tózimdi jáne senimdi bola tústińizder», degen Máýlen Áshimbaev jarys kezinde tóreshilerge kómek kórsetken eriktilerge de alǵys bildirdi.
Aıta keteıik, bıylǵy el birinshiliginde parasportshylar jekeleı synnan bólek, alǵash ret komandalyq jáne juptyq saıysta baq synady. Sondaı-aq Túrkistan jáne Batys Qazaqstan oblystarynyń bochchashylary Qazaqstan chempıonatyna birinshi ret qatysyp otyr. Máýlen Áshimbaev Federasııanyń aldaǵy jumys jospary týraly aıta kelip, osy jarystan keıin ulttyq quramada ózgerister bolatynyn jetkizdi.
«Federasııa chempıonattyń qorytyndysy boıynsha ulttyq quramanyń quramyn jańartýdy kózdep otyr. Bul saıysta top jarǵan sportshylar Polsha men Bahreınde ótetin halyqaralyq jarystarda el namysyn qorǵaıdy. Sondaı-aq elimizde de halyqaralyq týrnırler ótkizý máselesin qarastyryp jatyrmyz. Bıyl el chempıonatyn ótkizý barysynda alǵash ret Halyqaralyq bochcha federasııasynyń elektrondy bazasy qoldanyldy. Ol ár oıynnyń nátıjelerin onlaın rejimde baqylap otyrýǵa múmkindik beredi. Bul – elimizde halyqaralyq jarys ótkizý jolynda jasalǵan mańyzdy qadam. Aldaǵy jyldarda elordada álemniń basqa elderinen kelgen bochchashylardyń qatysýymen osyndaı jarystar ótkizýdi josparlap otyrmyz», dedi Qazaqstan bochcha federasııasynyń prezıdenti.
Bıylǵy chempıonatta jasóspirimder arasyndaǵy jekeleı synda óz sanattary boıynsha Amanaı Bathonov, Ýlıana Kýdınova, Azamat Amansha, Ardaq Altynbasov jáne Madııar Murathan jeńimpaz atandy. Al eresekter arasynda Baljan Bólekpaeva, Qýanysh Asqarbekov, Itıana Shyńǵyshanova, Aleksandr Kýrmantaev, Arýjan Jeńis, Temirlan Altynsary, Elmıra Mýsralıeva jáne Rýslan Erembaev top jardy. Juptyq saıysta Álıjan Baqytbekuly, Karım Salımov, Azamat Aıazbaev jáne Elmıra Mýsralıeva jeńiske jetse, komandalyq synda Astana qalasynyń parasportshylary Itıana Shyńǵyshanova, Merýert Tilebaldy jáne Erhat Almatqa teń keler eshkim bolmady.