1 maýsym Balalardy qorǵaý kúnine oraı Trıatlon saıabaǵynda «Charity Samruk Marathon – 2024» qaıyrymdylyq marafony ótti. Jınalǵan qarajat erekshe balalardy qoldaýǵa jumsalady, dep habarlaıdy Egemen.kz.
Buqaralyq júgirýge qatysqan 1200-den astam áýesqoı sportshylardyń kóbi – «Samuryq-Qazyna» AQ kompanııalar tobynyń qyzmetkerleri.
Jarys 5 jáne 10 shaqyrym qashyqtyq boıynsha ótti. Budan bólek, 400 metrlik jáne 1 shaqyrymdyq jarysqa 6 jastan asqan 200-den astam bala qatysty.
Búgingi is-sharanyń maqsaty – buqaralyq sportty nasıhattaýmen ǵana shektelmeıtinin, erekshe balalardy qoldaý úshin qarajat jınastyrý jalǵastyrylyp jatqanyn aıtqan «Samuryq-Qazyna» AQ basqarma tóraǵasy Nurlan Jaqypov: «Bir aıdyń kóleminde biz 125 mln teńgeden astam qarajat jınadyq, atalǵan qarajattyń barlyǵy Astana qalasynyń mektepteri men balabashalarynda ınklıýzıvti kabınetter ashýǵa jumsalatyn bolady», dedi.