Májilis tóraǵasy Erlan Qoshanov bastaǵan Parlament delegasııasy Almatyda Ujymdyq qaýipsizdik týraly shart uıymynyń Parlamenttik Assambleıasy Keńesiniń otyrysyna qatysty, dep habarlaıdy Egemen.kz Májilistiń baspasóz qyzmetine silteme jasap.
Erlan Qoshanov jıynǵa qatysýshylarǵa 2024 jyly Qazaqstannyń Ujymdyq qaýipsizdik týraly shart uıymyna tóraǵalyǵy kezindegi basymdyqtarynyń júzege asý barysy týraly aqparat berdi,
«Biz beıbitshilikti, halyqaralyq jáne óńirlik qaýipsizdik pen turaqtylyqty nyǵaıtý, múshe memleketterdiń táýelsizdigin, aýmaqtyq tutastyǵy men egemendigin qorǵaý isinde Uıymymyzdyń áleýetin damytýǵa basa nazar aýdardyq. Qazaqstan Prezıdenti – UQShU Ujymdyq qaýipsizdik keńesiniń tóraǵasy Qasym-Jomart Kemeluly Toqaev osy baǵyttardy iske asyrý jónindegi is-sharalar josparyn bekitti. Bul qujat qajetti modeldik zańdar men usynystardy ázirleý úshin bizdiń parlamentterimizdiń de úılesimdi is-áreketin qamtıdy», dedi Májilis spıkeri.
Erlan Qoshanov terrorızm men ekstremızmge, aqparattyq tehnologııalar men esirtki bıznesi salasyndaǵy qylmystarǵa qarsy kúreske baǵyttalǵan uıymǵa múshe elderdiń aýmaǵyndaǵy birqatar is-sharany atap ótti. Májilis tóraǵasy tótenshe jaǵdaılardyń aldyn alý jáne zardaptaryn joıý máseleleri boıynsha yntymaqtastyqty tereńdetýge erekshe mán berilip otyrǵanyn aıtty. Sonymen qatar jıynǵa qatysýshylar álemdegi jalpy geosaıası jaǵdaıdy talqylap, Taıaý Shyǵystaǵy ahýal erekshe alańdaýshylyq týǵyzatynyn atap ótti. Májilis spıkeri halyqaralyq qoǵamdastyq Aýǵanstandaǵy kúrdeli gýmanıtarlyq jaǵdaıdy da umytpaýy kerektigine nazar aýdardy.
«Parlamentaralyq deńgeıdegi syndarly jumysymyzdyń aıasynda biz osy máselelerge únemi erekshe nazar aýdaramyz. Qazirgi qaýip-qaterlerge qarsy turý úshin zańnamalyq bazany qamtamasyz etý maqsatymen elderimizdiń parlamentteri arasyndaǵy belsendi yqpaldastyqty jalǵastyrý mańyzdy dep sanaımyn», dedi Erlan Qoshanov.
Kezdesýge Qazaqstan tarapymen qatar Reseı Federasııasy Memlekettik Dýmasynyń tóraǵasy Vıacheslav Volodın, Belarýs Respýblıkasynyń Ulttyq jınalysy О́kilder Palatasynyń tóraǵasy Igor Sergeenko, Qyrǵyzstannyń Jogorký Kenesh tóraǵasy Nýrlanbek Shakıev jáne Tájikstan Respýblıkasy Madjlısı Olı Madjlısı mıllı tóraǵasy Rýstamı Emomalı bastaǵan delegasııalar men UQShU Bas hatshysy Imanǵalı Tasmaǵambetov, UQShU PA Atqarýshy hatshysy Sergeı Pospelov qatysty.