10 maýsym kúni Úkimette Premer-mınıstrdiń orynbasary Serik Jumanǵarınniń tóraǵalyǵymen ótken ortalyq jedel shtab otyrysynda óńirlerdegi ótken demalys kúnderindegi shegirtkeniń taralýyna qatysty jaǵdaı talqylandy, dep habarlaıdy Egemen.kz Úkimettiń baspasóz qyzmetine silteme jasap.
Belsendi taralý kezeńinde zııankestermen kúrestiń árbir kúni óte mańyzdy. Sondyqtan ortalyq jedel shtab aptasyna eki ret otyrys ótkizýge kóshti. Barlyq óńirler qarqyndy jumys rejıminde: ahýal únemi baqylaýǵa alynǵan jáne óńdeýdi kúsheıtý qajet jerlerge tehnıka men pestısıdterdiń qosymsha kólemi dereý jetkizilip jatyr.
Túrkistan oblysynda aptap ystyq pen shegirtkeniń qosymsha 60 myń gektar alqapqa taralýy jaǵdaıdy qıyndatyp otyr. 10 maýsymdaǵy jaǵdaı boıynsha onyń 45,3 myń gektary óńdeldi: Arysta – 36,8 myń gektar, Shardara aýdanynda – 6,7 myń gektar, Keles aýdanynda – 1,6 myń gektar.
Premer-mınıstrdiń orynbasary Serik Jumanǵarın uıymdastyrý jumystaryn jedel basqarý úshin Jetisý oblysyna, Aýyl sharýashylyǵy mınıstri Aıdarbek Saparov Túrkistan oblysyna, Aýyl sharýashylyǵy vıse-mınıstrleri Qostanaı jáne Aqtóbe oblystaryna jumys saparymen barady.
Sondaı-aq Aýyl sharýashylyǵy mınıstrliginiń 46 qyzmetkeri Túrkistan oblysyna issaparǵa jiberildi, olar óńdeýge tıisti jerlerdi anyqtaý maqsatynda aýmaqtardy zertteıdi. Zııankesterdiń taralý aımaqtary anyqtalǵan jaǵdaıda hımııalyq zattardyń eki eselengen dozasymen qaıta óńdeý jumystary júrgiziledi.