Qazaqstannan barǵan III Ulttyq ulan ofıseriniń qyraǵylyǵy men eptiligi Reseıdiń oblys ortalyǵyndaǵy kezekti qaıǵyly oqıǵanyń aldyn aldy, dep habarlaıdy Egemen.kz IIM Ulttyq ulannyń baspasóz qyzmetine silteme jasap.
Oqıǵa 2024 jyldyń 8 maýsymynda saǵat 19.30 shamasynda boldy. Podpolkovnık Jandos Nurahmetov balasymen Kastroma qalasynyń Galıchskaıa kóshesinde serýendep júrgende, №51 úıdiń 2 qabatynan 4-5 jastaǵy balany baıqaıdy. Ol ashyq terezeden oıynshyq, kıim, sómkelerdi laqtyryp jibergen.
«Men ótip bara jatqan turǵyndardan jalǵyz otyrǵan bala men onyń ata-anasy týraly suraı bastadym. Balaǵa ishke qaraı kir dep, qaýipti túsindirmek boldym. Alaıda balaqaı qulaq asa qoımady. Sol mańda turatyn bir áıel kelip, bul balanyń serebraldy sal aýrýy bar ekenin aıtty. Osy ýaqytta bala tereze arqaýyna asylyp, syrtqa shyǵýǵa umtyldy. Onyń qulap ketetinin sezip, bar daýsymmen aıqaılaı bastadym. Úı ishinde eresek adam bolsa, daýysty estisin dep. Alaıda, oılanyp, bireýdiń shyqqanyn kútip turatyn artyq ýaqyt bolmady. Dereý qubyr arqyly 2 qabatqa kóterilip, balany aqyryn terezege súırep apardym. Balamen birge páterge kirip, úıde eshkim joq ekenin túsindim. Men ketsem, taǵy qaıtalap júrer dep, balaqaıdy kóshege alyp shyǵyp, ata-anasyn jaqsy tanıtyn kórshilerine tapsyrdym», dedi ulandyq ofıser.
Aıta keterligi, podpolkovnık Jandos Nurahmetov búginde Reseı Federasııasynyń Kostroma qalasynda Keńes Odaǵynyń marshaly S.K. Tımoshenko atyndaǵy radıasııalyq-hımııalyq jáne bıologııalyq qorǵaý Áskerı akademııasynyń tyńdaýshysy.
Qazirgi tańda Qazaqstannan joǵaryda atalǵan Akademııada alty kýrsant, eki tyńdaýshy jáne bir adıýnkt bilim alyp jatyr. 2022 jyly QR Ulttyq ulanynyń Almaty oblysynyń Qarakemer kentindegi 6654 áskerı bóliminen atalǵan bilim ordasyna oqýǵa túsken. Bir aıdan keıin oqýdy támamdaıdy.
Qyrmyzy JUMAǴALIQYZY,
EUÝ stýdenti