Senattyń Konstıtýsııalyq zańnama, sot júıesi jáne quqyq qorǵaý organdary komıtetiniń depýtattary Sot saraptamalarynyń ǵylymı-tájirıbelik ortalyǵynda bolyp, Ádilet mınıstrimen jáne ortalyq ujymymen kezdesti. Júzdesýge qatysýshylar sot-saraptama qyzmetindegi zańnamany jetildirý jáne ózekti máselelerdi sheshý joldaryn talqylady.
Is-shara kezinde komıtet tóraǵasy Nurlan Beknazarov sot-medısınalyq saraptama sot isindegi mán-jaıdy obektıvti anyqtaýda jáne sot tóreliginiń sapasyn qamtamasyz etýde sheshýshi ról atqaratynyn atap ótti.
«Sot-saraptama qyzmeti salasynda bilikti mamandardyń jetispeýshiligi sezilip otyr, al keıbir óńirde materıaldyq-tehnıkalyq qamtamasyz etý deńgeıi óte tómen. О́zekti máselelerdiń biri – maman sarapshynyń jetispeıtini, oǵan jalaqynyń azdyǵy, eńbek júktemesiniń joǵarylyǵy jáne áleýmettik kepildiktiń kóńil kónshitpeýi sebep bolyp otyr. Qazirgi ýaqytta 140 bos jumys orny ashyldy. Aýmaqtyq bólimsheler ǵımaratynyń tozýy jáne olardyń qajetti jabdyqpen qamtamasyz etýdegi kemshilikter de ózekti máseleler qatarynda. Bul qylmystyq isterdi tergeý sapasyna, sot talqylaýyna jáne azamattardyń quqyqtaryn qorǵaýǵa keri áserin tıgizýi yqtımal», dedi Nurlan Beknazarov.
Ádilet mınıstri Azamat Esqaraev sot medısınasyn odan ári damytý maqsatynda aýdandyq jáne aýdanaralyq sot medısınasy bólimshelerin, sondaı-aq molekýlalyq-genetıkalyq zerthanalardy ashý úshin qarjy bólý qajettigin atap ótti. Qyzmetkerlerdiń biliktiligin arttyrý asa mańyzdy ekeni aıtyldy. Bul máseleni oblys ákimdikterinen sot-medısınalyq sarapshylardy oqytýǵa arnalǵan maqsatty granttar alý arqyly sheshýge bolady. Sonymen qatar sıntetıkalyq esirtki men kıberqylmystyń jańa túrleriniń únemi ósýi sot saraptamasy qyzmetin úzdiksiz jetildirýdi talap etedi.
Senatorlar hımııalyq jáne bıologııalyq zertteýler qyzmetterinde, sondaı-aq gıstologııalyq jáne hımııalyq-toksıkologııalyq bólimderde boldy.